Jimco, Maarso, 10, 2017 (HOL) - Degmada Caabudwaaq ee gobolka Galguduud ee
bartamaha Soomaaliya waxaa gaaray qoysas isaga soo barakacay deegaannadii
miyiga oo ay ku noolaayeen kadib markii ay ka dhamaadeen xoolihii ay
dhaqanayeen islamarkaana waayeen wax ay ku noolaadaan.
Qaar ka mid ah dadkan ayaa sheegay
in ay dadka reer miyiga ah aysan aqoon nolal kale oo ah dhaqashada xoolaha iyo
tacabka dhulka, markii ay labadaa meesha ka baxeenna ku adkaatay nolasha,
taasoo keentay in ay soo maciin bidaan magaalooyinka.
Dadka qaar waxaa ay ka soo tegeen
ilmahoodii wali oo miyiga jira oo ay u awoodi waayeen in ay jidka soo
wada maraan, waxaana ay codsadeen in gurmad deg deg ah lala soo gaaro.
Xalwo Xasan Dirir oo ka mdi ah dadka soo
dhaweeyay barakacayaasha soo gaaray degmada ayaa bulshada qeybaheeda kala duwan
ka codsatay inay gacan ka geystaan sidii loogu gurman lahaa dadka ay abaartu
sameysay.
Abaarta oo ah mid saameyn xun
yeellatay ayaa lagu waramayaa in ay tahay tii ugu darneyd oo waayadii ugu
danbeeyay soo marta dalka, waxaana dadka u wehliya abaarta cuduro uu ka mid
yahay shuban biyood ah oo ay u dhimanayaan caruurta iyo dadka waayeelka ah.
C/raxmaan Diini, Hiiraan Online
[email protected]
