Jimco, Maarso, 10, 2017 (HOL)- Wararka naga soo gaaraya magaalada Gaalkacyo
ee gobolka Mudug ayaa sheegay in mid ka mid ah xildhibaannada gollaha deegaanka
degmada Gaalkacyo oo lagu magacaabo Cabdifataax Xassan Xusseen dhaawac fudud ka
soo gaaray weerarka xalay lagu qaaday.
Kooxo hubeysan ayaa xalay weerar ku
qaaday, waxaana xildhibaanka rasaastii lagu furay ka soo gaaray dhaawac
fudud, sida ay warbaahinta u sheegeen saraakiisha laamaha ammaanka ee ku sugan
Gaalkacyo.
Askari ka agdhawaa goobta lagu
weeraray xildhibaanka ayaa waxaa uu rasaas ku furay dableydii, inkastoo ay
goobta ka baxsadeen.
Xildhibaan C/fataax Xasan
Xuseen oo dhaawac fudud uu ka soo gaaray gacanta ayaa islamarkiiba waxaa loola
cararay isbitaal ku yaalla Magaalada Gaalkacyo ee xarunta Gobolka Mudug.
Ugu danbeyntii, maalin ka hor ayay
aheyd markii Magaalada Gaalkacyo uu ka dhacay Qarax Gaarigiisa loogu xiray
Xildhibaan C/qaadir Faarax Bootaan oo ka mid ah xildhibaanada Baarlamaanka
Maamulka Puntland, kaasi oo soo gaaray dhaawac culus.
C/raxmaan Diini, Hiiraan Online
[email protected]
