Sabti, June, 24, 2017 (HOL) – Mas’uuliyin iyo saraakiil ka
kala tirsan dowladda federaalka Soomaaliya, maamulka Hirshabeelle iyo xubno ka
tirsan Ahlu Sunna Waljameeca oo maalmihii ugu danbeeyayba ku sugnaa deegaanka
Banyaaley ee gobolka Hiiraan ayaa heshiis hor dhac ah ka gaaray dagaal halkaa
ku dhaxmaray maleeshiyaad ka soo kala jeeda gobollada Hiiraan iyo Galguduud.
Saraakiisha dowladda Soomaaliya,
mas’uuliyiinta maamuladda Hirshabeelle iyo Ahlu Sunna oo si wada jir ah ula
hadlay warbaahinta ayaa sheegay in lagu heshiiyay labada dhinac marka hore in
la kala qaado maleeshiyada oo la sheegay in la kala dajiyay deegaannada Qodqod
iyo Hees oo ka wada tirsan degmada Matabaan ee gobolka Hiiraan.
Wasiirka dib-u-heshiisiinta
maamulka Hirshabeelle Yuusuf Axmed Hagar Dabageed ayaa sheegay in dadaal dheer
iyo wada hadal kaddib lagu guuleystay sida uu hadalka u dhigay in la kala qaado
maleeshiyaada labada dhinac, isaga oo intaa ku darray in wixii wadahadal ah
lagu balamay in dib leysugu soo laabto bisha Ramadaan kaddib.
Odayaasha labada dhinac ayaa soo
dhaweeyay heshiiska hor dhac ah ee laga gaaray colaada deegaanka Banyaaley oo
ay ku dhinteen tiro ka badan 20 ruux oo labada dhinac ka soo kala jeeda.
Jen Maxmed Axmed Tareedijo oo hor
kacaya ciidamada dowladda Soomaaliya ee ku sugan deegaanka ayaa faray
maleeshiyada labad dhinac iyo odayaasha dhaqanka in loo hogaasamo heshiiska la
gaaray, wixii khilaaf ah ee jirana lagu
dhameeyo sida uu hadalka u dhigay wada hadal.
Mas’uuliyiinta maamulka Ahlu
Sunna ee qeybta ka ah joojinta colaada ayaa dhinacooda warbaahinta u sheegay in
ay ku dadaali doonaan ka hortaga dagaal danbe oo deegaanka ka dhaca.
C/raxmaan Diini, Hiiraan Online
[email protected]
