Gollaha amaanka oo war ka soo saaray xiisada ka dhaxtaagan dowladdaha Jabuuti iyo Eritrea
Arbaco, June, 21, 2017 (HOL) - Golaha
Ammaanka ee Qaramada Midoobey ayaa ku baaqay in xal nabadeed laga gaaro muranka
dhanka xuduuda ee u dhaxeeya dalalka Eritrea iyo Jabuuti, kaddib markii ciidamo
nabad ilaalin oo ka socday Jabuuti ay todobaadkii hore isaga baxeen aagga
dhuleed ee muranka ka jiray.
Jabuuti ayaa ku eedeysay ciidamada Eritrea inay la wareegeen dhullka
buuraleyda ee Dumeira, maalin kaddib markii ay isaga baxeen ciidamada nabad
ilaalinta Qatar ee halkaas dhex dhexaadinta u joogay.
Golaha Ammaanka ayaa dhageystay warbixin uu u soo gudbiyay Midowga Africa oo
ku saabsanaa xiisada sii kordheysa ee labada dal u dhaxeysa, waxaana uu ku
baaqay in muranka ka jira xuduuda lagu dhameeyo si nabad ah oo waafaqsan
sharciga caalamiga ah.
Sidoo kale Golaha Ammaanka ayaa soo dhoweeyay dadaalada uu Midowga Afrika
wado, kaasoo la doonayo in Guddi xaqiiq raadin loogu diro xuduuda, si ay u soo
qiimeeyaan xaalada.
QM iyo ururka Midowga Africa ayaa isku dayaya in ay dajiyaan xiisadda iyo
muranka dhinaca xadka ah ee u dhaxeeya dalalka Djibouti iyo Eritrea, kadib
markii dowladda Qatar ay la baxday 450 ciidamo nabad-ilaalin ah oo labada dal
ku kala dhexjiray.
Xubin ka tirsan golaha Ammaanka ayaa sheegay inay midowga Africa ka wada
shaqeynayaan, si loo abuuro jawi degan oo la is xakamaneynayo, sidoo kalena ay
soo dhoweynayaan eegista dhisida hanaan kalsooni oo labada dhinac mustaqbalka
lagaga abuuri karo.
Dowladdaha Jabuuti iyo Eritrea ayaa lababa xiriir wanaagsan la leh Sacuudi Carabiya iyo
Imaaraadka Carabta, taas oo keentay inay la saftaan dhinac la saftaan.
C/raxmaan Diini, Hiiraan Online
[email protected]
