Dowladda Soomaaliya oo sheegtay in ay isku soo dhiibeen 50 dhalinyaro ah oo ka tirsanaa Al-shabaab
Arbaco, June, 14, 2017 (HOL) - Dowladda
Soomaaliya ayaa shaaca ka qaaday in 50
dhalinyaro ka tirsanaa Al-Shabaab ay isku soo dhiibeen, iyagoo ka
faa’ideysanaya cafiskii uu Madaxweyne Farmaajo u fidiyay.
Wasiirka gaashaandhigga Soomaaliya C/rashiid Cabdullaahi Maxamed oo ka mid
ahaa madax ka tirsan dawladda oo shalay kormeer ku tagay saldhigga ciidamada
Laanta Buuro halkaasi oo ay iska soo dhiibeen laba ka mid ah dhalinyarada ayaa
sheegay in badi dadka isku soo dhiibay dawladda ay ka tirsanaayeen dhalinyarada
u dagaalanta Al-Shabaab.
“Ilaa 50 dhalinyaro ah oo ka tirsanaa
Al-Shabaab ayaa labadii bilood ee la soo dhaafay isku soo dhiibay dowladda
Soomaaliya, waxay ka faa’ideysteen cafiska uu Madaxweynaha Jamhuuriyada u
fidiyay”ayuu yiri Wasiirka Gaashaandhigga.
Madaxweyne Farmaajo ayaa bishii April ee sanadkan ugu baaqay dhalinyarada la
qalday ee ka tirsan Al-Shabaab inay isku soo dhiibeen dowladda Soomaaliya, isla
markaana uu cafis u fidiyay muddo 60 cisho gudahood.
Hadalkan ayuu Wasiirka shalay ka sheegay xilli isaga iyo Saraakiil ka tirsan
ciidamada xoogga dalka ay kormeer ku tageen dugsiga tababarka ciidamada ee
Laanta-Buuro, halkaasoo lagu xareeyay ciidamadii laga saaray Muqdisho.
C/raxmaan Diini, Hiiraan Online
[email protected]