Wararkii ugu danbeeyay dagaal culus oo xalay ka dhacay deeganno ka tirsan gobolka Hiiraan
Arbaco, June, 14, 2017 (HOL) - In ka badan 10 ruux ayaa lagu waramayaa in ay
ku dhinteen ku dhawaad 20 ruux kalana ku dhaawacmeen dagaal culus oo xalay ka dhacay
deegaanno ka tirsan gobolka Hiiraan, kaa oo u dhaxeeya maleeshiyaad ka soo kala jeeda gobollada Hiiraan iyo
Galguduud.
Guddoomiye ku-xigeenka degmada Maxaas Cali Xaaji Xassan oo
la hadlay warbaahinta ayaa sheegay in dagaalka uu salka ku hayo dhul la
deegaameyn rabay sida uu hadalka u dhigay.
‘’Dagaalkan runtii waa mid salka ku haya lahaansho deegaan,
waayo waad ogtahay abaartii ka dhacday
gobollada dhexe dad badan ayaa u soo guuray gobolka Hiiraan oo ka yimid dhinaca
Galguduud waa la soo dhaweeyay , intaa kaddib waxaa ay bilaabeen in ay la
dagaalamaan dadkii deegaanka’’ ayuu yiri guddoomiye ku-xigeenka degmada Maxaas.
Laakiin dhinaca kale mas’uuliyiinta maamulka gobolka
Galguduud oo dagaalka ka hadlay ayaa sheegay in uu salka ku hayo xoolo la kala
dhacay, iyaga oo eeda dagaalkan socda dusha uga tuuray Al-shabaab oo ay
sheegeen in ay iska horkeenayaan beelaha dagaalamaya.
Dadka ku dhaawacmay dagaalkii xalay ka dhacay deegaan lagu
magacaabo Baanyaale oo ka tirsan gobolka Hiiraan ayaa la dhigay isbitaal ku
kala yaala degmooyinka Beledweyne, Guri-ceel iyo Dhuusa-mareeb.
Guddoomiyaha gobolka Galguduud Maxamed Cali Cilmi oo
warbaahinta la hadlay ayaa sheegay in tirada dhimashada ay ka warqabaan
dhan tahay 7 ruux laakiin intaa ka sii
badan karto.
Wararkii ugu danbeeyay ee ka imanaya deegaannada lagu
dagaalamayo ayaa sheegaya in wali halkaa ay ka jirto xiisad colaadeed.
C/raxmaan Diini, Hiiraan Online
[email protected]