Isniin, June, 12, 2017 (HOL) - Ra’iisul wasaaraha xukuumada Soomaaliya
Xassan Cali Kheyre iyo wafdi uu horkacayo ayaa goor dhaw gaaray magaalada Addis
Ababa ee dalka Itoobiya, halkaa oo uu uga qeybgali doono shir madaxeedka urur
gobolleedka IGAD.
Wafdiga uu hoggaaminayo ra’iisul wasaaraha oo saakay ka ambabaxay magaalada
Muqdisho ayaa Mas’uuliyiin ka tirsan dowladda ku soo dhoweeyeen Garoonka
diyaaradaha Bole International Air Port.
Ka qeyb galka ra’iisul wasaaraha ee shirka IGAD ayaa timid kaddib markii uu
madaxweyne Maxamed Cabdullaahi Farmaajo ka baaqday ka qeybgalka shirka.
Ra’iisul Wasaare Kheyre ayaa inta uu joogo Addis Ababa ayaa waxaa uu la
kulmi doonaa Madaxda wadamada IGAD ee shika ka qeyb galaya.
Shirka Urur goboleedka IGAD ayaa looga hadlayaa colaadaha iyo xaaladaha
bani’aadanimo ee ka jira dalka Koofurta Sudan, iyadoo shirkan uu todobaadkii
hore ku baaqay Ra’iisul Wasaaraha Itoobiya oo shir guddoonka shirka ah.
Safarka ra’iisul Wasaaraha ku tagay
Itoobiya ayaa ah kii u horeeyay ee wadamada deriska ku tago, sidoo kale waa
safarkii labaad ee uu dibadda ugu ambabaxo.
C/raxmaan Diini, Hiiraan Online
[email protected]
