Axad, June, 11, 2017 (HOL)- Sheeko cajiib ah ayeey noqotay kaddib markii
diyaarad ka soo duushay dalka Slovenia ku sii soctay dalka Britain si degdeg ah loo dejiyay, kadib markii
duuliyaha lagu wargaliyay rag saarnaa diyaarada oo ka mid ahaa rakaabka in ay u
shekeysanayeen ama u wadda hadlayeen siddii ‘’argagixasada oo kale ".
Waxaa la sheegay in habeenimadii Sabtida arintan loo xiray saddex nin, kaddib
markii diyaaraddan oo ay leedahay shirkadda Easyjet lagu dejiyay garoonka
Cologne-Bonn ee dalka Jarmalka.
Waxaa dhamaanba si deg deg ah looga dajiyay diyaaradaha 151 rakaab ah,
waxaana duulimaadka la hakiyay muddo saddex saac ah. Booliska ayaa sidoo kale
burburiyay boorso ay wateen raggaasi.
War qoraal ah oo uu soo saaray booliska magaalada Cologne ayuu ku sheegay in
qaar ka mid ah rakaabka ay shaqaalaha diyaarada ku wargeliyaan in saddexda nin
ay ka sheekaysanayeen argagixisanimo, balse faahfaahin dheeraad ah laguma
sheegin qoraalka.
Shirkadda Easyjet ayaa sheegtay in duuliyaha uu gaaray go'aanka dejinta
diyaaradda, si uu u hubiyo ammaanka rakaabka diyaaradda saaran.
Dhammaan rakaabka diyaaraddaasi ayaa la siiyay meel ay seexdaan, waxaana ay
duulimaadkooda dib u billaabayaan maanta oo Axada ah, sida ay shirkadda
sheegtay.
Dhacdooyinka noocan oo kale ayaa marmarka qaar noqon kara kuwa diidaya
maskaxda qofka bani’aadamka ah, hasse ahaatee waxaa muuqata in ay tahay mid ka
mid ah walwalka ballaaaran ee laga qabo falalka argagixisada dunida oo hadda
u muuqda kuwo heerkoodii ugu sareeyay.
C/raxmaan Diini, Hiiraan Online
[email protected]
