Wasiir ka tirsan maamulka K/galbeed oo ugu baaqay gollaha wasiirrada maamulkaas in ay is casilaan
Isniin Janaayo, 09,
2017 (HOL) - Wasiirka Diinta iyo
Ow-qaafta maamulka gobolleedka K/galbeed Macalin Barre, ayaa ugu baaqay gollaha
wasiirrada maamulka in ay is casilaan, isaga oo sharci darro ku tilmaamay
musharaxnimada Shariif Xassan Sheekh Aadan.
Macalin Barre, ayaa sheegay in sharci darro tahay in Shariif
Xassan Sheekh Aadan sii ahaado sida uu hadalka u dhigay madaxweynaha maamulka
K/galbeed mar haddii uu ku dhawaaqay in uu yahay musharax u taagan xilka
madaxweynaha Soomaaliya.
‘’Waa arin sharci daro ah, waxaa loo baahan yahay Shariif
Xassan Xassan haddii uu yahay musharax u taagan xilka madaxweynaha in uu isaga
taggo xilka uu ka hayo maamulka K/galbeed’’ ayuu yiri wasiirkan oo ka hadlayay
munaasabad ka dhacday magaalada Muqdisho.
Gollaha xildhibaannada baarlamanka maamulka K/galbeed ayuu
ugu baaqay in ay yeeshaan kulan deg deg ah looga arinsanayo sidii loo heli
lahaa hogaan cusub oo badala Shariif Xassan Sheekh Aadan.
Sidoo kale gollaha wasiirada K/galbeed ayuu ugu baaqay in ay
dhamaantood is casilaan, madaama ayuu yiri ay ku fashilmeen shaqadii ay umadda u
hayeen.
‘’Dadka waa dhibaateysan yahay, wixii dhaqaalle ahaa ee
loogu talagalay in ay wax looga qabto xaalada adag ee deegaannadaas ka jirta,
waxaa lagu baabi’inayaan hoteello ‘’ ayuu yiri wasiirka ka tirsan maamulkan
K/galbeed.
Ugu danbeyntii, Maamulka K/galbeed ayaa laheyn madaxweyne ku-xigeen sida mamulada kale ee dalka.
C/raxmaan Diini, Hiiraan Online
[email protected]
