Guddiga doorashada oo ku dhawaaqay in gabi ahaanba la joojiyay dooddii musharixiinta
Talaado, Janaayo, 31, 2017 (HOL) – Guddiga qabanqaabada
musharixiinta xilka madaxweynaha oo goor dhaw shir jaraa’id qabtay ayaa sheegay in gabi ahaanba la joojiyay dooddii musharixiinta oo qorshuhu ahaa in maanta
la qabto.
Guddoomiyaha gudiga doorashada doorashada Dr C/raxmaan Ducaale Beyle oo goor dhaw dadka
kala hadlay warbaahinta Qaranka ayaa faah faahin marka hore ka bixiyay wax sababay
in ay baaqato dooddii maanta qorshuhu ahaa in la qabto.
‘’Sida aan horayba u sheegnay jadwalka doorashadana ku qoran
maanta waxey aheyd in la hergaliyo qeyb ka mid ah jadwalka doorashada oo aheyd in musharixiinta
dadka hor yimaadaan su’aalo toos ahna la weydiiyo, labo qeybood ayaan u kala qeybinay
musharixiinta oo kala ah 12 musharax in gallinka hore ka qeyb-qaataan doodda,
halka inta kalana loo qorsheeyay in ay soo xaadiraan galinka danbe, waxaana soo
ajiibay oo noo yimid 9 musharax, markii ay doodda wax xooggaa soctay ayaa
ogaanay in Internetku laheyn awood uu ku gudbin karo doodda oo loo baahnaa in
toos loo tabiyo, waan tan keentay in
dooddii halkaa ku baaqato’’ ayuu yiri guddoomiyaha gudiga doraashada.
Guddoomiyaha ayaa sheegay in arintan aheyd mid tijaabo ah oo
ku cusub marka la eego jadwalka doorashada madaxweynaha, sidaa daraadeed waxaa
uu sheegay in ay go’aan ku gaareen gabi ahaanba in la joojiyo doodda oo halkaa
lagu hakiyo, madaama ayuu yiri waqtigu aad u kooban yahay.
‘’Arintan markii horeba waxaa ay iska aheyd arin tijaabo ah
oo ku cusub jadwalka doorashada, sidaa daraadeed waxaan go’aan ku gaarnay in
gabi ahaanba aan halka ku joojino doodda, madaama waqtigu aad ciriiri noogu
yahay, dhinaca kalana jadwalku naga qaldamin’’ ayuu hadalkiisa sii raaciyay
guddoomiyaha gudiga doorashada.
Sidoo kale waxaa uu
sheegay in musharax walba u furan tahay in uu iska soo duubo muqaal shan
daqiiqo ah oo dadka uu kula hadlayo, waxaana uu balanqaaday in muuqaalkaa si
toos ah looga sii deynayo TV Qaranka.
Ugu danbeyntii, guddoomiyaha ayaa sheegay in cilada farsamo
ee ku dhacday Internetka la oran karin cid gaar ah ayaa ka danbeysay, madaama ayuu yiri gudigu arinta si dhab ah u
baareen islamarkaana soo ogaadeen in ay aheyd cilad saameyn ku leh xitaa wadamada
dariska ah.
C/raxmaan Diini, Hiiraan Online
[email protected]
