Sabti, Janaayo, 28, 2017 (HOL) – Saraakiisha ciidamada
dowladda ee ku sugan degmada Baardheere ee gobolka Gedo ayaa warbaahinta u
sheegay in ay isku diyaarinayaan weerar culus oo ka dhan ah deegaannada
Al-shabaab ay gacanta ku hayaan ee gobolka Gedo.
Faarax Max’ed Turbac oo ka mid ah saraakiisha ciidamada
dowladda ee gobolka Gedo ayaa sheegay in militariga ciidamada dowladda
Soomaaliya ee ku sugan degmada Baardheere ee gobolka Gedo dajiyeen qorshayaal
ka dhan ah Al-shabaab oo la doonayo in looga sifeeyo sida uu hadalka u dhigay
deegaannada ay ka joogaan gobolka Gedo.
‘’Deegaannada hadda nagu hareereysan ilaa 40km ciidamadeena
waa ay tagaan mana aragno, laakiin waxaa jira deegaannada sii fog oo isla
gobolka ka tirsan oo saldhigyo ay ku leeyihiin halkaasoo ay ka soo abaabulaan
weerarada, sidaa daraadeed saldhigyadaa ayaa rabaa in aan ku weerarno ayuu yiri’’
sarkaalka u hadlay ciidamada dowladda ee gobolka Gedo.
Al-shabaab ayaa wali ku xoogan islamarkaana howlgalo ka
sameeya deegaanno dhowr ah oo ka tirsan Koonfurta Soomaaliya gaar ahaan
gobollada Gedo iyo Jubbooyinka.
Gobolka Gedo ayaa ka mid ah deegaannada ay sida weyn
Al-shabaab uga abaabulaan weerarada ka dhanka ah ciidammada dowladda iyo kuwa
howlgalka midowga Afri ca AMISOM ee ku sugan Koonfurta Soomaaliya.
Ugu danbeyntii, hadalkan ka soo yeeray saraakiisha ciidamada
dowladda ee gobolka Gedo ayaa imanaya xili weerarkii ugu danbeeyay Al-shabaab
ay ka fuliyeen deegaanka Kulbiyoow ee gobolka Jubbada hoose iyaga oo halkaa ku
dilay tiro wali aan si rasmi ah loo cadeyn oo ka tirsanaa askarta Kenya ee
qeybta ah howlgalka midowga Africa AMISOM.
