Kooxda Daacish oo Rakaab ay ku jiraan Askar ka Afduubtay inta u dhaxeysa Bosaaso iyo Qandala
Sawirka: Qaar kamid ah Ciidamada Puntland oo gudaha u galay Qandala ka dib ka bixintaankii Daacish.
Sabti, Janaayo, 28, 2017 (HOL) –Kooxo
ka tirsan ururka Daacish ee ku sugan gobolka Bari ayaa lagu soo waramayaa in
dad gaarayaa 13 qof ay ka afduubteen jidka u dhaxeeya magaalada Bosaso iyo
Qandala sida laga soo xigtay dad –goob-joogayaal ah.
Dadkan ay afduubteen Daacish ayaa waxaa ku jiray
askar ka tirsan ciidamada Puntland ,kuwaasi oo ka soo laabtay Qandala oo markii
hore loo geeyay arimo la xiriira
dagaalka ka dhanka ah kooxda ISIL oo fariisan ku lahayd degmadaas..
“Walaal gaariga waxaa saarnaa rakaab gaaraya 16 Qof
, kaliya waxa ay sii daayeen darawalkii iyo qof dumar ah iyo ilma yar oo ay wadatay “ ayuu yiri goob-jooge dalbaday in
aan la magacaabin, kaasi oo la hadlay warbaahinta gudaha.
Ilaa iyo had-da lama ogo halka lala aaday dadka la
afduubtay oo sidoo ay ku jiraan odayaal dadka deegaanka ah , waxaana
afduubkooda uu imaanaya xilli ay degmada Qandala ku sugan-yihiin ciidamo badan
oo ka tirsan Puntland.
Madaxweyne C/wali Gaas ayaa dhawaan booqasho uu ku
tagay degmada Qandala sheegay in kooxda Daacish dagaal adag lala gali doono tan
iyo inta laga saarayo goobaha ay kaga
sugan-yihiin gobolka.
Ugu danbayn ,ma jiro waxa hadal ah oo ka soo baxay maamulka dowladda oo ku aadan soo
furashada dadka la qabsaday ,waxaana maalmihii la soo dhaafay jiray xiisado u
dhaxeeya Puntland iyo Daacish oo ka taagnaa qaybo kamid ah deegaanada hoostaga
Qandala.
Hiiraan Online News Desk
