Sabti, Janaayo, 28, 2017 (HOL) –Wasaarada difaaca dowladda Kenya ayaa war
qoraal ah oo ka soo baxay waxaa lagu sheegay in weerarkii Al-Shabab ku qaaday
saldhig militari oo ciidamadooda ay ku lahaayeen deegaanka Kulbiyoow ay ku
dhinteen sagaal ka tirsan askarta Kenya.
Waxaa sidoo kale warsaxaafadeedka ka soo baxay Kenya lagu sheegay in
weerarkaa lagu dhaawacay 15 askari oo ka mid ahaa ciidamadii ku sugnaa
saldhiga.
Hassa ahaatee Al-shabaab ayaa dhinacooda sheegtay in ay in ay dileen 67
askari oo ka tirsan Kenya. Hase yeeshee dawladda Kenya ayaa iyaduna dhinaceeda
sheegatay in 70 maleeshiyada Al-Shabab ah ay ku dishay weerarkaasi.
Kenya waxay beenisay in saldhiggu uu ka baxay gacanta ciidamadooda, waxayna
sheegeen inay iska difaaceen weerarka.
Dadka degaanka ayaa sheegay in
saacadihii hore ee shalay oo Jimco aheyd Al-shabaab la wareegeen gacan ku
heynta saldhiga.
Ugu danbeyntii, weerarka ayaa marka laga soo tago dhinacyadii dagaalamay
sidoo kale waxaa ku dhitay dadka shacab ah oo uu ka mid ahaa guddoomiyihii
degaanka Kulbiyow Maxamed Tooxyare Nuuh.
C/raxmaan Diini, Hiiraan Online
[email protected]
