Sabti, Janaayo, 21, 2017 (HOL) – Dab xoogan oo saameyn weyn
ku yeeshay suuqa ugu ballaaran degmada Dherkeenley ayaa goor dhaw qabsaday
qeybo badan oo ka mid ah suuqa sida uu Hiiraan Online goor dhaw u sheegay qof
ku sugan suuqa oo aan la hadalnay.
Goob joogaha ayaa inoo sheegay in dabka uu qabsaday qeybo
badan oo ka mid ah suuqa, gaar ahaan qeybta ugu muhiimsan ee lagu iibiyo Dharka
iyo Kabaha, isaga oo sheegay in hada ay
halkaa ku sugan yihiin dadweyne isaga kala yimid degmada oo badan ganacsato
doonaya in ay hintooda ka badbaadiyaan dabka.
‘’Goobta waxaa ku sugan gadiid dadka ay ku raranayaan wixii
hanti ahaan ee suuqa ka yaalay qeybaha uusan dabka gaarin, sidoo kale waxaa jooga gadiidka dabdamiska oo
aan ilaa iyo hada ku guuleysan in ay dabka damiyaan’’ ayuu yiri qofkan la hadlay
Hiiraan Online
Suuqa uu dabka qabsaday oo lagu magacaabo Suuq Boocle ayaa
ka mid ah suuqyada ugu caansan gobolka Banaadir, oo ay ku yaalaan goobo ganacsi oo dhowr ah.
Dabkan ayaa ku soo beegmay xili sidoo kale isla duhurnimadii
maanta dabkan oo kale ah uu ka kacay suuqa ugu weyn Soomaaliya ee Bakaaraha hasse
haatee lagu guuleystay in markii danbe in la damiyo, lamana garanayo xiriirka
ka dhaxeeya dabka suuqa Bakaaraha iyo kan goor dhaw ka kacay suuqa degmada
Dherkeenley.