Sabti, Janaayo, 21,
2017 (HOL) – Warar dheeraad ah iyo faah faahin ayaa ka soo baxaya dab xoogan oo
duhurnimadii maanta ka kacay qeybo ka mid ah suuqa Bakaaraha, gaar ahaan inta u dhaxeysa
safarweynaha iyo suuqa timirta.
Gaar ahaan dabka ayaa ugu horeyn ka kacay makhaayad sida la
sheegay ka soo jeeda masjidka Shuhadaa ee ku yaala gudaha Cabdala Shidiye,
waxaana uu bilaabay dabka in uu u gudbo dhismayaal
kale oo ka agdhawaa goobta uu markii hore ka kacay.
Ganacsatada suuqa ayaa bilaabay in ay hantidooda kala baxaan
dhismayaasha ka agdhaw qeybaha suuqa ee wali dabka uu ka soconayo.
Goobta waxaa ku sugan ilaa shan dabdamis oo isku dayaya in
ay damiyaan dabka, waxaana sidoo kale goobta ku sugan ciidamo ka tirsan
dowladda Soomaaliya oo dadka ka ilaalinaya in ay xatooyo iyo boob ka geystaan
suuqa.
Qof ku sugan Suuqa ayaa sheegay in ilaa iyo hada khasaare
nafeed uusan geysan, hasse ahaatee uu
jiro khasaare hantiyeed, waloow aan si rasmi ah loo ogeyn inta uu khasaaraha la
eg yahay.
Suuqa Bakaaraha ayaa ah suuq siweyn cariir u ah oo
dhimayaasha yihiin kuwo siweyn isugu dhaw dhaw, waxaana xusid mudan in suuqa ay
ku badan yihiin goobaha makhaayadaha ah ee laga cunteeyo, kuwaa inta badan sahla
dabka ka kaca suuqa.
C/raxmaan Diini, Hiiraan Online
[email protected]
