Somalida Toronto oo Dibad-bax ka Hor dhigay Xafiiska Duqa Magaalada Toronto iyo Muslimiinta oo Doonaya in dib loo Furo Masjidka Sakiina
Sabti, Janaayo, 21, 2017 (HOL) –Bulshada Soomaaliyeed ee ku nool magaalada Toronto ayaa dibad bax
balaaran ka hor-dhigay afaafka hore ee xafiiska duqa Toronto John Torry
si cabasho looga muujiyo go’aan ka soo baxay maamulka magaalada ,kaasi oo lagu
xiray Masjidka Sakiina.
Masjidka Sakiina ayaa gabi-ahaanba
albaabada loo laabay bishii labaad ee sanadkii hore ka dib markii lagu soo
eedeeyay dhismaha uu ku yaalo in uusan lahayn agab-yada bad-baadada ee ka
hortagi kara dabka iyo walxaha kale ee khatarta sababi kara.
Maamulka Masjidka ayaa la sheegay in uu
wax ka qabtay cabshada laga gudbiyay, waxaana dadaalo dhowr ah oo arinta laga
galay la sheegay in ay ku so dhamaadeen natiijo la’aan xilii Sakiina uu
muslimiinta Toronto u yahay xarun ay ku kulmaan.
Sheikh Saciid Raage oo kamid ah
asaasayaasha Masjidka Sakiina ayaa sheegay in sababta ay u dibad-baxayeen ay
ahayd in lala kulmo John Tory ka dib markii ay guul-daraysteen wada-hadalo
arintan ku saabsan oo horey u dhex-maray iyaga iyo Michael Thompson.
“Duqa Toronto horey waxa uu u diiday in
uu nala kulmo ,balse markii ay muslimiinta magaalada dibad-baxan isugu yimadeen
waxa uu aqbalay in aan is aragno ,waxaanse doonaynaa in muddo laba asbuuc
gudaheed ah aan kulan kale yeelano “ ayuu yiri Sheikh Saciid.
Shiekh Saciid ayaa sheegay in arintan ku
saabsan dhismahan loola dhaqmay si aan cadaalad ahayn ,waxaana uu tilmaamay in dowlad-du
ay doonayso in muslimiinta ay ku khasbaan in gabi-ahaanba dhismaha ay ka
guuraan ,taasi oo uu tilmaamay in ay tahay mid aan macquul ahayn.
“Waxey doonayaan in meelihii aynu ka
iibsan jirnay masaajiyada iyo madaaristaba
in ay xiraan oo ay nagu khasbaan in aynu ka iibsano masaajidyada meelaha la
dagan-yahay ,taa waxaa ku dheer qiimaha lagu iibsanayo oo shan jeer kor u
kacaya ,taasina waa mid-da aan ka soo horjeed-no “ ayuu mar kale xusay Sheekha.
Sheekh Abdirashiid oo isna kamid ah
hogaanka Masaajidka Sakiina ayaa sheegay in gabi-ahaan-ba ay xaliyeen arintan
ku saabsan bad-baadada dhismaha ,isla markaana ay ogaadeenn in dowladdu ay
doonayso in gabi-ahaanba dhismahan ay xirto.
Maayarka Magaalada Toronto oo lagu
khasabay in uu wax ka badalo jadwalkiisa si uu la kulmo dadkii dibad-baxayay
ayaa sheegay in uusan ka hordhicin karin waxa uu sharcigu ka qabo dhismahan ,balse
ay arintaasi u taalo xildhibaanada degmada ,isaga oo tilmaamay in go’aanada la-qaatay
ay un sabab ku yimaadeen.
“ Waxaa jira sharciyo la xiriira arimaha
dhismayaasha ,si lamid ah waxaan leenahay sharciyo ku aadan arimaha bad-baada
sidaa darteed waa in aanu hubino arintaasi in ay waafaqdo labadaa
sharci “ ayuu yiri John Torry mar uu la
hadlayay dadkii dibad-baxayay.
Ugu danbayn ,Muslmiinta magaalada
Toronto ayaa ku adkaysanaya in aysan ka guuri doonin dhismaha ay hadda
dagan-yihiin ,isla markaana ay samayn doonaan wax walba oo awoodooda ah si dib
loogu furo Masjidka Sakiina.
Faysal M. Hassan
[email protected]