Sabti, Janaayo. 21, 2017 (HOL) – Wararka
ka imanaya gobolka Baay ayaa sheegaya in howlgal ay sameeyeen ciidamada ee ka
howlgala deegaannada hoostga gobolka lagu dilay horjooge caan ah oo ka tirsanaa
Al-shabaab.
Saraakiisha ciidamada dowladda Soomaaliya ee gobolka Baay, ayaa sheegay in ay
dileen sarkaal ka tirsanaa Al-shabaab, kadib howlgal ay ciidamada ka sameeyeen
deegaanka lagu magacaabo Ceel Dhuun Adeegow oo 45-km dhinaca waqooyi kaga
began magaalada Baydhabo.
Magaca sarkaalka la dilay ayaa lagu sheegay C/laahi Gaab oo sida ay
saraakiisha ka dhawaajiyeen dhibaato xoog leh ku hayay dadka deegaanka.
Ciidamada dowladda ayaa inta badan howlgalo ka sameeya deegaanno hoostaga
gobollada Baay iyo Bakool oo ay ku xoog badan yihiin dagaalamayaasha
Al-shabaab, waxaana deegaannadaa la dhaca iska horimaadyo dhaxmara
labada dhinac.
Ugu danbeyntii, inkastoo saraakiisha dowlada sheegteen in ay dileen sarkaalka
ka tirsanaa Al-shabaab, hadana dhinaca Al-shabaab arinta wax war ah kama aysan
soo saarin.
C/raxmaan Diini, Hiiraan Online
[email protected]
