Hantidhowrka Qaranka oo sheegay in aysan jirin cid ku takri fali karta hantida Qaranka
Sabti, Janaayo, 21, 2017 (HOL) - Hantidhowrka guud ee Qaranka Dr Nuur Faarax
Jimcaale oo ka hadlayay eedeymo waayadii ugu danbeeyayba loo jeedinayay madaxda
ugu sareysa dalka, aya sheegay in aysan jirin cid ku takri fali karta sida uu
hadalka u dhigay hantida Qaranka.
Dalka Soomaaliya ayaa xiligan ku jira marxalad doorasho
waxaana jira shaki weyn oo soo baxaya kaasoo la xiriira in mas’uuliyiinta
dowladda qaarkood olalaha doorasho u isticmaalayaan hantida Qaranka.
‘’Xafiiska aan maamulo waxaa uu u xil saaran yahay ilaalinta
hantida dadweynaha iyo sida loo maamulayo, hadii la sheego musuq maasuq iyo wax
is daba marin howsha xafiiska aan mas’uulka ka ah waxa weeye in aan daba-gal ku
sameyno, baarno waxa ka jira eedeymaha
la soo jeediyo,’’ ayuu yiri hanti-dhowrka Qaranka.
Dr Nuur Faarax Jimcaale, ayaa intaa ku daran in hay’adda
dowlada awood u laheyn in ay kharashaadka iska soo dalbadaan ilaa la soo maro maamulka maaliyada dalka oo hadba
wixii kharash ah ee loo baahan u diyaariya hab nidaamka waafaqsan.
‘’Annaga hadii aynu Soomaali nahay waxaan ku shaqeynaa waa la yiri iyo sidan bey aheyd, annaga ka ma
ogin ilaa iyo hada musuq maasuq dhacay
iyo hanti lagu takri falay, mana jirto cid ku takri fali karta hantida Qaranka
ayuu yiri’’ hantidhowrka guud.
Ugu danbeyntii, hadalka hantidhowrka guud ayaa imanaya xili
ay sii kordhayaan eedeymaha musharixiinta u taagan xilka madaxweynaha u
jeedinayaan mas’uuliyiinta ugu sareysa Qaranka oo laftirkooda ah musharixiin u
taagan xilka madaxweynaha, kuwaa oo lagu eedeynayo in ay hantida Qaranka u faa’ideysanayaan
doorashada.
C/raxmaan Diini, Hiiraan Online
[email protected]