Arbaco, Janaayo, 18,
2017 (HOL) -- Dhawaan ayaa la filayaa in
la soo doorto guddoonka aqalka sare ee Soomaaliya oo ah aqal ku cusub hay’addaha
dowladda madaama taariikhda inta la
xasuusto Soomaaliya laheyd oo kaliya hal aqal oo ah kan gollaha shacabka.
Haddaba durbaba waxaa soo ifbaxaya hadal heyn ka dhax jirta
xildhibaannada aqalka sare oo la xiriirta habka awoodqeybsiga guddoonka aqalka
sare iyo sida ay beellaha u qeybsanayaan.
Xildhibaan C/risaaq Jurile oo ka mid ah mudanayaasha aqalka
sare kana soo jeeda deegaannada Puntland ayaa beeniyay in beesha uu ka soo jeedo isku soo
taagtay qabashada xilka guddoomiyaha aqalka sare.
‘’Waxaa la ii sheegay
in warbaahinta qaarkeed qortay in beesha Daarood shirtay, ayna go’aansatay in
ay raadsadaan guddoomiyaha aqalka sare, Aniggana leysku afgartay in aan isku soo taago
xilkaas, warkaasi waa been, waana waxba kama jirin, shirna ma dhicin cid
arintaa isaga timidna ma jirto’’ ayuu yiri Jurile.
Jurile ayaa intaa ku darray in marka la eego awood qeybsiga
dalka xilka guddoomiyaha aqalka sare isku soo taagi karaan oo kaliya xubnaha ka
soo jeeda G/waqooyi ama Soomaaliland,
sida uu hadalka u dhigay.
‘’Sida qorshuhu yahay guddoomiyaha aqalka sare waxaa isku soo
taagi kara oo kaliya xubnaha ka soo jeeda beellaha G/waqooyi oo la filayo in ay
araajidooda u gudbiyaan gudiga qabanqaabada doorashada’’ ayuu yiri Jurile.
Dhinaca kale xildhibaannada aqalka sare oo dhamaantood ay
soo doorteen baarlamaannada dowlad gobolleedyada ayaan meesha ka saarin marka
ay gudiyada qeybsanayaan isticmaalka qabiilka oo xubnaha qaarkood siweyn uga
soo horjeesteen.
Ugu danbeyntii, C/waaxid
Cilmi Goonjeex oo ka mid ah xildhibaannada aqalka sare ayaa kula dardaarmay
xubnaha ku jira gollahan in ay meel iska dhigaan isticmaalka qabiilka, taa badalkeedana marka
wax la qeybsanayo lagu saleeyo nidaamka awood-qeysiga dowlad gobolleedyada.
C/raxmaan Diini, Hiiraan Online
[email protected]
