Jimco, Feberaayo, 17, 2017 (HOL) –Madaxweynaha dowladda
Soomaaliya Maxamed Cabdullaahi Farmaajo oo khubad ka jeedinayay munaasabadii
xil wareejinta maalintii shalay, ayaa sheegay in dowladdiisu xoogga saari
doonto dhismaha ciidamada qalabka sida ee Soomaaliya si looga maarmo ayuu yiri
ku tiirsanaanta ciidamada shisheeye.
Waxaa uu si gaar ah ugu mahad celiyay ciidamada AMISOM oo sida uu hadalka u
dhigay madaxweynaha naftooda u huray nabada Soomaaliya.
‘’ Waxa la isa siiyo nafta ayaa ugu qaalisan ciidamada AMISOM naftooda
ayeey noo hureen, ayuu yiri madaxweyne Farmaajo.
Madaxweynaha waxaa uu sheegay in la dhisi doono ciidamo Soomaali ah, kuwaasoo
awood u yaalanaya in ay badalaan ciidamada nabad ilaalinta dalka u jooga ee
AMISOM.
“Waxay ku noqon doonan dalalka ay ka yimaadeen,marka aan dhisno ciidamo
xooggan oo Soomaali ah,”ayuu ku daray hadalkiisa Maxamed Cabdullaahi
madaxweynaha cusub ee Soomaaliya.
Ugu danbeyntii, ciidamada dowladda iyo kuwa howlgalka midowga Africa AMISOM
ayaa wali la tacaalaya sidii looga adkaan lahaa kooxda Al-shabaab oo weeraro
kala duwan ku qaadaya saldhigyada ay degan yihiin ciidamada iyo xarumaha
muhiimka ah ee dowladda.
C/raxmaan Diini, Hiiraan Online
[email protected]
