Dibadbax looga soo horjeedo colaad ka taagay gobolka Sool oo ka dhacay Laascaanood
Talaado,
Feberaayo, 14, 2017 (HOL) – Dibadbax looga soo horjeedo colaad dad badan salfatay oo sanadihii la soo dhaafay ka
taagnayd koonfurta gobolka Sool ayaa ka dhacay magaalada Laascaanood.
Isu soo baxan oo ay soo
qabanqaabiyeen ururada dhalinyarada, Urarka Saxaafadda iyo haweenka ayaa socod
lug ah ku maray inta badan jidadka magaalada Laascaanood iyagoo ugu danbayntii
ku soo gabagabeeyey degaanada ay labada beelood wada degaan ee koonfurta
magaalada.
Qudbado kala duwan oo dhamaantood
lagula hadlayey labada Beelood ee walaalaha ah ee colaadu dhexmartay ayaa laga
soo jeediyey iyadoo xusuus uga dhiga dhigayey wanaagii hore ee u dhaxayn jirey.
“Waxaad ahaydeen Walaalo, waxaad
tihiin Xidid, Abti, Seedi iyo wax kasta oo dad isjecel wadaagaan waad
wadaagtaan, shaydaan ayaa idinka dhex shaqaystay ee iska naara oo iska fogeeya,
xusuustana ciqaabta maalinta Danbe” sidaa waxaa tidhi Maryan Maxamuud oo
haweenka afkooda ku hadlaysey.
C/raxmaan Cali Ducaale iyo C/qani
Xasan Geerash oo ku hadlayey Bahda Saxaafadda ayaa waxa ay sheegeen in aan hada
wixii ka danbeeya la eegan Karin dhibaatada ka dhex taagan labada beelood,
iyagoo xusay in haatan ay gaadgey in caruurtii laga saaro iskoolada.
Taliyaha Qaybta Booliska Gobolka
Sool Ibraahin Jaamac Daad ayaa waxa uu sheegay in dhibaatada taagan ay haatan
tahay mid ka balaadhan mid ciidanku xakamayn karo, waxana uu ugu baaqay in
wadahadalka miiska nabada lagu soo noqdo.
Qaar ka mid ah bahda Suugaanta oo
ugu mudnaa Abwaan Jaamac Kediye ayaa halkaa hadalo dardaaran, waxsheeg iyo
tusaalayaal kala duwan suugaan ku soo bandhigay.
Inkasta oo meelaha qaarkood ay kala
kulmeen dadka banaanbaxayey rabshado dhagax loo adeegsadey oo labada beelood
qaarkood dhalinyaro ka mid ahi kala horyimaadeed ma dhicin wax khasaare ah oo
la sheego marka laga reebo laba qof oo dakhar soo gaadhey.
Si kasta ha ahaatee waxa uu isu soo
baxani noqday mid sidii la rabay u dhacay, waxaana uu soo jeediyey indhaha
bulshada iyadoo todobaadyadii la soo dhaafay dagaalo qasaare dhimasho, dhaawac,
mehersdo la baabiiyey iyo barakacba uu ka taagnaa, waxaana rajo laga qabaa in
markale loo tabaabulshayto sidii miiska wadahadalka laysugu soo celin lahaa
waxgaradka labada beelood.
Seynab Cabdi Warsame
[email protected]
Laascaanood G. Sool