Munaasabad lagu soo dhaweynayay doorashada madaxweyne Farmaajo oo ka dhacday magaalada Phoenix USA
Talaado, Feberaayo, 14, 2017 (HOL) -Munaasabad
lagu taageerayay Madaxweynaha la doortay ee Soamaaliya Mudane Maxamed Cabdulahi
(Farmaajo) oo ka dhacday Phoenix Arizona USA.
Munaasabad si weyn loo soo agaasimay
oo ay ka qeybgaleen dad aad u faro badan, isla markaana lagu taageerayay
dowladda cusub ee Soomaaliya ayaa ka dhacday magaalada Phoenix ee dalka
Mareykanka.
Munaasabaddan ayaa waxaa ka hadlay
dad aad u badan kuwaasi oo taagero buuxda u mujiyay madaxweynaha la doortay ee
Soomaaliya Mudane Maxamed Cabdulaahi Farmaajo.
Ugu horreyn waxaa munaasabadda ka
hadlay Mustafe Xaaji Af-Balaadh Gudoomiyaha Somali Association Of Arizona oo ku
hadlayay magaca dadkii soo qabanqaabiyay munaasabadda, wuxuuna u mahadceliyay
dadkii ka soo qeybgalay munaasabadda oo uu sheegay in ay ka kala yimaadeen
Magaalooyinka kala duwan ee Gobalka Arizona.
Intaas kaddib Musatafe Xaaji waxaa
uu sheegay in munaasabadda ay u qabteen in ay taageeraan dowladda cusub ee
Soomaaliya, gaar ahaan madaxda tayada leh ee la doortay, wuxuuna madaxweynaha
Soomaaliya Maxamed Cabdulaahi Farmaajo u rajeeyay in uu Allaah u fududeeyo
xilka loo doortay. Sidoo kalena wuxuu bogaadiyay madaxweynihii hore
Xasan Sheikh Maxmuud oo uu halyeey Soomaaliyeed ku tilmaamay, isagoo xusay in
Xasan Sheikh Maxamuud iyo xukuumadihii la soo shaqeyay ay soo gaarsiiyeen dalka
meel ay dadka Soomaaliyeed dhammaantood ku niyad-weyn yahiin.
Sidoo kale waxaa munaasabadda ka
hadlay Cabdifitax Ahmed Cabdikariin wuxuuna sheegay in dadka Soomaaliyeed ay maanta
heystaan fursad ay kula shaqeyn karaan dowladda Somaaliya maadama la
doortay Madaxweyne ku yimid rabitaanka bulshada Soomaaliyeed waa siduu
hadalka u dhigaye.
Waxaa uu intaas ku daray Cabdifitaax
in dadka Soomaaliyeed ay u gurmadan sidii loo dhisi lahaa Ciidamada Qaran oo ay
yeelato Dowladda dhexe ee Soomaaliya mushaarkodane ay bixiyaan Jaaliyadaha
dibada.
Dhanka kale waxaa ka mid ahaa dadkii
ka hadlay Munaasabadda loogu dabaal-dagayay Madaxweeynaha la doortay ee
Soomaaliya (Farmaajo) Sacdiyo Abdirizaq oo ka mid aheyd madax Jaaliyadda
Soomaaliyed ee Arizona oo tilmaantay in maanta ay Soomaaliya Fursad u heysato
sidii ay cagahooda dib isugu soo taagi lahaayen lana jaan qaadi lahayen
caalamka intiisa kale.
Col Jamac Bariir oo ka mid ah
saraakiishii hore ee ciidamaddii Soomaaliya ayaa isagana munaasabadda ka
hadlay, wuxuuna talo u jediyay madaxweynaha la doortay in la soo celiyo
saraakiishii hor ee ciidamada, lana howlgeliyo, wuxuuna madaxweynaha ka
codsaday in uu arrimaha amniga xoogga saaro iyo dhaqaalaha si macluush iyo
Ciidan la,aanta Soomaaliya looga samata-bixiyo
Ugu dambeyntiina waxaa si wada jir
ah munaasabadda usoo gabagabeyay madaxda Jaaliyadda Soomaalyeed ee Somali
Associan Of Arizona Hambalyo iyo Bogaadine u jeediyay Madaxweynaha Maxamed
Cabdulahi Farmaajo iyo Baarlamanka Soomaaliyeed ee la doortay.
Abdulrahman D Nur
[email protected]
[email protected]
Hiiraan Online Phoenix Arizona
