Sabti, December, 09, 2017 (HOL)- Wararka ka imanaya gobolka Baay ayaa
sheegaya in ciidamada maamulka Koonfur Galbeed weerar ku qaadeen Saldhig Ururka
Al Shabaab ay ku leeyihiin deegaan dhaca duleedka degmada Buur-Hakabo ee
Gobolka Baay.
Wararku waxaa ay sheegayaan in dagaal halkaa ka dhacay galinkii danbe ee
shalay lagu dilay Xubno ka tirsan Ururka Al Shabaab, kaddib markii uu iska
horimaad dhaxmaray ciidamada Koonfur Galbeed iyo Shabaab.
Sarkaal ka tirsan ciidamada Maamulka Koonfur Galbeed ayaa Warbaahinta u
sheegay dagaalkaasi inay ku dileen laba xubnood oo ka tirsan Al Shabaab.
Wuxuu sheegay in sidoo kale ciidamada Koonfur Galbeed ay soo furteen qoryo ay
ku dagaalamayeen Shabaabkii ay dileen sida uu xaqiijiyay Sarkaalkaasi.
Ciidamada Koonfur Galbeed oo ka ambabaxay Magaalada Buur-Hakabo ayaa dib ugu
soo laabtay Magaaladaasi, kadib dagaalkii ay ku qaadeen Shabaab.
Al Shabaab kama aysan hadlin illaa hadda labadan askari ee looga dilay
dagaalka dhexmaray ciidamada Maamulka Koonfur Galbeed iyo Shabaab.
C/raxmaan Diini, Hiiraan Online
[email protected]
