Khilaaf soo kala dhaxgalay Kooxda Fanka ee Xidigaha Geeska iyo Jawaabta Abwaan Laab Saalax
Arbaco, December, 06 2017 (HOL) – Kooxda Fanka ee Xiddigaha geeska
ayaa khilaaf soo kala dhexgalay awgeed xilkii ka qaaday gudoomiyaha kooxdoodda
Abwaan Xasan Laabsaalax.
Guddida fulinta ee kooxda
Xiddigaha geeska shir ay yeesheen ayaa lagu go’aamiyey in xilkii gudoomiyenimo
laga qaado, isla markaaana si ku meel gaadh ah loogu dhiibay xoghayihii kooxda
Maxamed Bakaal Cirro oo inta gudoomiyenimo la dooranayo isagu sii maamuli doono
kooxda.
“ shir ay isagu yimaadeen gudida
fulinta ee kooxda Xiddigaha Geeska iyo xubnaha kooxdu waxay xilkii
gudoomiyenimo ee kooxda cod gacan taag ah kaga qaadeen Gudoomiyihii hore ee
kooxda xidigaha geeska Xasan Saleebaan Maxamed ( Laab Saalax) ka dib markii uu
gudan waayay waajibaadkii shaqo ee kooxdu u igmatay sida uu dhigayo sharciga
kooxdu.Islmarkaa waxay kooxdu cod gacan taag ah ku sime gudoomiye ugu doorteen
xoghayaha kooxda Maxamed Axmed Bakaal Cirro)”sidaas waxa qoraal ku soo saaray
gudida fulinta kooxda xidigaha geeska.
Dhinaca kale, Gudoomiyihii xilka
laga qaaday Xasan Dhuxul Laabsaalax ayaa sheegay in isagu hawlo u gaar ah
darteed uu shaqaddii fanka iyo hawlihisa
kale isku wadi kari waayey,isla markaana go’aansaday inuu gudoomiyenimadii
kooxda wareejiyo.
“ lixdii sano ee kooxdu jirtay sideed bilood
mooye intii kale aniga maamulayey, culayska fanka uu leeyahayna tahay mid adag,
in la isku hayo rag wada caan ah oo aad maamushid wax fudud maaha, waxaanay si
ixtiraam iyo wada shaqayn fiican mudadaasi ila soo shaqeeyeen asxaabtaydu”ayuu yidhi
Laabsaalax oo ka hadlayey xil ka qaadistaasi lagu sameeyey.
Mar uu ka hadlayey sababta ugu
weyn ee uu xilka uga tagay waxa uu yidhi “Laba toddobaad kahor ayaan mid mid
iyo si wadar ahba ugu sheegay in aanan gudoomiye ka sii ahaanayn xiddigaha
geeska hawlahayga gaarka ah darteed, laba qodob ayaan ka xusi karaa sababta
gudoomiyaha uga degay, horta nolosha hiigsi ka fog ka fanka ayaan ka leeyahay
jaamacadan baan dhigtaa wakhtigii faraha badna ee aan fanka siinayey ama
xiddigaha galin jiray waxaan jeclahay
inaan nolosha kale galiyo, qodobka labaadna waxa weeyi waxaan ahay nin aabo ah
caruurtaydu Ingiriiska ayey deganaayeen gabi ahaanba waan ka soo raray oo
halkan ayey hadda degan yihiin, waxay u baahan yihiin in wakhti la siiyo in
madarasada iyo iskuula la geeyo arrimahaasi waxay keeneen in aan isku wadi kari
waayey hawlihi kooxda ee taagna mar
walba iyo hawlihii gaarka ii ahaa”
Si kastaba ha ahaatee, khilaafkan soo kala
dhexgalay ayaan si cad usoo shaac bixin, waxanay labada dhinacba si taxadar leh
iskaga dhowreen inay cadeeyaan halka khilaafka ka yimid iyo sababta xilka looga
qaaday gudoomiyihii hore ee kooxda.
Barkhad-ladiif M. Cumar, Hiiraan
Online
[email protected]
Hargeysa, Somaliland
