Axad, December, 03, 2017 (HOL) -Munaasabad lagu
xusayay Maalinta Caalamiga ee Naafadada Aduunka 03d December ayaa maanta lagu
qabtay magaalada Muqdisho iyadoo ay ka soo qeybgaleen Masuuliyiin ka tirsan dowladda
Federaalka Soomaaliya oo isugu jira xildhibaanno iyo Wasiiro, Culuma’udiin iyo
qaar ka mid ah dadka baahiyaha gaarka ah qaba, .
Ugu Horeyn Sheekh Nuur Baaruud Gurxan ayaa
sheegay in loo baahanyahay dadka qaba baahiyaha gaarka in la tixgaliyo loona
naxariisto oo garabkooda la istaago, waxaana Dowladda Federaalka Soomaaliya uu
ugu baaqay in qeyb ka siiso fursadaha shaqo ay bixiso dadka naafada ah.
Xildhibaan Sadiiq Warfaa oo munaasabadani
maalinta Naafada Aduunka soo qaban qaabiyay ayaa sheegay in munaasabadaan
ay leedahay ahmiyad gaar ah islamarkaana loogu talo galay dadka qaba baahiyaha
gaarka ah, waxaana uu sheegay sababta munaasabadani uu u qabtay in ay tahay in
uu dhiira galiyo dadka baahiyaha gaarka ah qaba waxaana uu sheegay in meel
wanaagsan ay mareyso qorshaha sidii dadka baahiyaha gaarka ah qaba ay u heli
lahaayeen sharci taasi oo la doonayo in baarlamaanka uu ansixiyo Sharciga dadka
baahiyaha gaarka qaba.
Guddoomiyaha Guddiga Xuquuqul Insaanka
Baarlamaanka Dalka Marwo Xaawo Yuusuf aayaa sheegtay ka guddi ahaan in ay gacan
ka geysan doonaan sidii dadka baahiyaha gaarka ah qaba ay u heli lahaayeen
xuquuqaha ka maqan islamarkaana ay qorsheynayaan in Dowladda ay mudnaan siiso
dadka naafada shaqooyinka la soo dhajiyana qoondo ay ka helaan tusaale qeybtaan
waxaa iska leh dadka naafada ah in la yaraahdo si mooraal ay ugu noqoto.
Guddoomiyaha Guddiga Difaaca Baarlamaanka
Soomaaliya Xuseen Carab Ciise oo isna munaasabadda ka hadlay ayaa muujiyay sida
ka xildhibaanno ahaan ay u garab taaganyihiin dadka baahiyaha gaarka qaba
waxaana uu ugu baaqay in ay ka shaqeeyaan sidii ay u heli lahaayeen midnimo,
waxaana uu u mahadceliyay Xildhibaan Sadiiq Warfaa oo soo qaban qaabiyay
munaasabadaasi kuna ammaanay sida mar walbo uu ugu warqabo dadka baahiyaha
gaarka ah qaba.
Wasiir ku xigeenka Wasaaradda Shaqada iyo Arrimaha
Bulshada Xukuumadda Federaalka Soomaaliya Cabdisiis Saalax Carmaan oo munaasabadda soo xiray ayaa
munaasabdda ka sheegay in dadka Naafadaha ay mudan yihiin in la Dhiiro galiyo
islamarkaana door wanaagsan ay ku yeeshaan horumarada Bulshada, isagoo carabka
ku adkeeyay ka wasaarad ahaan ay diyaar u yahiin in mar walba ay u adeegaan
dadka baahiyaha gaarka ah qaba.
Qaar Ka Mid Ah dadka baahiyaha gaarka qaba oo
iyana hadlay ayaa Dowladda Federaalka Soomaaliya ugu baaqay in loo sameeyo
Wasaarad u gaar ah, waxaana ay sheegeen In aanba laga warqabin, sidoo kale
waxay xukuumadda ka codsadeen in looga saaro dadka degan Xaruumihii ay ku
lahaayeen magaalada Muqdisho.
03da December ayaa ah maalinta caalamiga ah ee
loo aqoonsaday naafada adduunka, waxaana loogu talagalay in lagu dhiiro
galiyo dadka qaba baahiyaha gaarka ah.
Mustaf Hussien
[email protected]
