Axad, December, 03,
2017 (HOL) – Guddi ayaa lagaga dhawaaqay magaalada Buuhoodle kuwaas oo
isku soo dubaridi doona Shirweyne ay yeelanayaan Beelaha dega Gobolada Sool,
Koonfurta Sanaag iyo Buuhoodle.
Shirkan oo ay ku dhawaaqeen Madaxda
dhaqanka ayaa ahaa mid dhawrjeer dib u dhac uu ku yimi, waxaana hada la
shaaciyey 27 xubnood oo la sheegay in ay ahaan doonaan gudiga qabanqaabada
shirka ay beelahaasi yeelan doonaan.
Garaad C/salaan Xassan Maxamed
Afhayeenka madaxda Dhaqanka oo aan la xidhiidhnay ayaa waxa uu sheegay in
gudigaasi jiraan islamarkaana uu shirkani ahaa mid duruufo jirey oo abaartii
baahsanayd ay ka mid ahayd u qabsoomi Waayey.
"Waa mid u furan dhamaan
bulshada SSC in ay ka soo qayb galaan. ha ahaado mid Somaliland ka tirsan ama
Puntland ama Khaatumo, amaba waxkale ha aaminsanaado, waxaa laga rabaa in talo
laysu keeno oo laga arinsado wixii bulshadani ku midoobi lahayd ee masiirkeeda
noqon lahaa" ayuu yidhi Garaad C/salaan.
Sidoo kale Maxamuud Warsame Cali oo
ka mid ah gudiga la magcaabay waxa uu sheegay in gudi ahaan hawlo badan iyaga
sugayaan, oo ay ka mid tahay, xiliga Suuragalka ay tahay ee shirka la qaban
doono, ergooyinka ka soo qayb gelaya, dhaqaalaha uu shirkaasi u baahan yahay
iyo qaabaynta Ajandaha,
Shirkan oo mudo dheer lagu soo
celceliyey qabsoomidiisa ayaa la sheegay waqtiyo kala duwan lagu qaban doono
magaalada Buuhoodle, taas oo ka feydan dhulka ay si toos ah u maamulaan
maamulada Somaliland iyo Puntland, kuwaas oo uu shirkani keeni karo waxyaabo
aanay raali ku ahayn.
Golaha madaxada dhaqanka oo gaadhaya
15 ayaan wax khilaaf ah ka muujin in shikaasi beel ahaan laysugu yimaado isla
markaana uu ka dhoco magaalada Buuhoodle.
Maamulka Khaatumo oo laba garab ah
ayaan shirkaas saamayn ku yeelan doonin sida ay qirayaan xogo laga helayo
madaxda dhaqanka, waxase aan meesha ka madhnayn in shirkan uu sababteeda lahaa
Prof. Cali Khaliif Galayr oo hogaan u ah maamulka Khaatumo ka dib markii uu
wadahadal la galay Somaliland.
2012kii ayaa shir kan oo kale ah oo
beelahani u dhanyihiin lagu qabtay magaalada Taleex ee G. Sool kaas oo uu ka
dhashay maamulka Khaatumo, haddaba waxaa isweydiintu tahay Soomaliland oo Shirkaas
hore gacan siisay kan sidee ayay yeeli doontaa, Puntland oo feejignaan ka
qabtey kii hore iyo kanba maxaa laga fili doonaa, door intee leeg ayay dawlada
federaalka ahise ku yeelan doontaa?
Seynab Cabdi Warsame
[email protected]
Laascaanood G/Sool
