Axad, December, 03, 2017 (HOL) --Sheekh
Mukhtaar Roobow Abuu Mansuur oo maalmihii ugu danbeeyayba ku sugnaa deegaanno
ka tirsan gobollada Baay iyo Bakool ayaa markii ugu horeysay booqday saldhigyo
ciidan oo ku yaala magaalada Baydhabo.
Mukhtaar Rooboow oo kol hore isku soo dhiibay dowladda Soomaaliya ayaa
maalmo ka hor si weyn loogu soo dhoweeyay magaalada Baydhabo, iyadoo dadweyne
fara badan ay soo dhaeeyeen caleema.
Afhayeenka Maamulka Koofur Galbeed Nuuradiin Gacma ayaa sheegay in Mukhtaar
Roobow uu kormeero qeybo ka mid ah magaalada oo ay ku jiraan goobo uu isaga
codsaday, balse aanay xilligan warbaahinta ka sheegeyn.
Afhayeenka maamulka Koonfur Galbeed Nuuradiin Gacma ayaa sheegay in maalmaha
soo socda la faah faahin doonno ujeedada safarkiisa iyo meelihii uu booqday,
marka ay soo idlaadaan kulamada.
Mukhtaar Roobow ayaa la sheegay inuu doonayo in guluf dagaal uu ku qaado
Al-Shabaab, waxaana la sheegay in Maamulka Koofur Galbeed kala hadlayo sidii
taageero loo siin lahaa maleeshiyaad taageersan oo ku sugan Gobolka Bakool.
C/raxmaan Diini, Hiiraan Online
[email protected]
