Sabti, December, 02, 2017 (HOL) – Kulan looga hadlayay howlgalka Midowgga
Africa AMISOM ayaa shalay ka dhacay Xarunta Midowga Afrika ee magaalada Addis
Ababa ee dalka Itoobiya, iyadoo kulanka diiradda lagu saaray howlaha iyo
taageerida AMISOM iyo Ciidanka Soomaaliya.
Shirkan oo ahaa kii 25aad oo ay yeeshaan Guddiga qaabilsan howlgalka AMISOM
ayaa waxaa shir guddoominayay Guddoomiyaha Guddiga Ammaanka iyo Nabadgelyada
Midowga Afrika Amb. Smail Chergui.
Waxaa sidoo kale shirka ka qeyb galay Wakiilka Midowga Afrika ee Soomaaliya,
Taliyaha Gudu ee AMISOM, Taliyeyaasha Ciidamada ka jooga Soomaaliya, sida
Burundi, Jabuuti, Kenya, Itoobiya, Uganda iyo Nigeria oo ciidamo Boolis ka
joogaan Soomaaliya.
Shirkan ayaa waxaa looga hadlay sidii loo heli lahaa ilo dhaqaale ciidanka
AMISOM iyo ciidamada xoogga dalka, waxaa walwal laga muujiyay hoos u dhaca ku
yimid dhaqaalihii Midowga Yurub ku bixin jiray howl galka AMISOM.
Guddoomiyaha Guddiga Amniga iyo Nabadgelyada Midowga Afrika ayaa sheegay in
Al-Shabaab khatar ku yihiin amniga iyo xasiloonida gobolka, waxaa uu xusay in
loo baahan yahay sidii ciidamada Soomaaliya ammaanka ugala wareegi lahaayeen
AMISOM, isla markaana loo taageeri lahaa qalabeyntooda.
Dhinacyada shirka ka qeybgalay ayaa isku afgartay weerar iyo howlgal
ballaaran lagu qaado, iyadoo la soo jeediyay in Midowga Afrika,
AMISOM, T/PCCs iyo UNSOS kulan gaar ah ka yeeshaan khatarta Al-shabaab iyo
Lojistikada dagaalka ee loo baahan yahay, waxaa kale la isla gartay in la
xoojiyo tababarka la siiyo ciidamada Soomaalida si awood ugu helaan la
wareegidda ammaanka.
Shir kale oo looga hadlayo ammaanka ayaa la filayaa in 4-5 bisha December
lagu qabto magaalada Muqdisho, waxaana shirkan la xiriiraa sidii loogu diyaar
garoobi lahaa in Ciidamada Soomaaliya ay ammaanka dalka ugala wareegi lahaayeen
AMISOM.
C/raxmaan Diini, Hiiraan Online
[email protected]
