Miisaaniyada dowladda oo markii ugu horeysay loo soo banddhigayo Ururada bulshada rayidka
Sabti, December, 02, 2017 (HOL) – Guddiga Maaliyadda iyo Qorsheynta ee Baarlamaanka
Soomaaliya ayaa markii ugu horeysay horgeyn doona Miisaaniyada dowladda ee
sanadka 2018ka Ururada bulshada rayidka.
Qeybaha bulshada kulanka ka qeybgali doona ayaa lagu wadaa in ay su’aalo
weydiiyaan Guddiga Miisaaniyadda , Maaliyadda iyo Qorsheynta ee golaha Shacabka
ay Shacabka ugula tashan lahaayeen Miisaaniyadda dowladda 2018.
Guddiga Miisaaniyadda , Maaliyadda iyo Qorsheynta ee golaha Shacabka ayaa
doonaya in ay shacabka u soo bandhigaan Warbixin
ku saabsan qaabka loo diyaariyay miisaaniyadda 2018 iyo qaabka loogu qoondeeyay
Hay’addaha dowladda.
Guddiga ayaa sheegay in Talooyinka ay bulshada ka aruuriyaan in ay ku dari
doonaan Miisaaniyadda dowladda 2018 maadaama sida ay sheegeen miisaaniyadaan
2018 ay tahay mid sareysa oo ka duwan miisaaniyadihii hore.
Miisaaniyadda 2018 ee dowladda federaalka Soomaaliya ayaa gaareysa lacag
dhan $274,640,191 (labo boqol iyo toddobaadan iyo afar Milyan, lix boqol iyo
afartan kun, boqol iyo Sagaashan Kow dollar).
Miisaaniyaddii hore ayaa ahayd 260 milyan, Farqiga u dhaxeeya labada
miisaaniyadood ee 2017 iyo tan cusub ee 2018 ayaa ah 14 milyan oo micnaheedu
yahay 5.63% ayaa ku korortay Miisaaniyada cusub ee 2018.
Sidoo kale waxaa miisaaniyad gaar ah loo qoondeeyay oo miisaaniyadaan ku
jira dhismaha warshada dharka ee ciidamada qalabka sida.
C/raxmaan Diini, Hiiraan Online
[email protected]
