Dagaal ciidamo ka tirsan dowladda ku dhaxmaray degmada Kaaraan ee gobolka Banaadir
Khamiis, December, 14, 2017 (HOL) –Ciidamo ka wada tirsan
dowladda Soomaaliya ayaa saddexdii cisho ee la dhaafayba ku dagaalamaya qeybo
ka mid ah degmada Kaaraan, waxaana la sheegay in dagaalkan ay ku dhinteen ilaa
saddex Askari oo ka wada tirsan ciidamada dowladda.
Dadka degmada Karaan oo warbaahinta la hadlay ayaa
sheegay in dagaalka uu salka ku hayo dhul leysku qabsaday oo waxaa ay wararku
sheegayaan in ciidamada dowladda la kala safteen dhinacyada laahaanshaha dhulka
isku haya.
Xalay ayaa lagu waramayaa in mar kale dagaal isla degmada uu ku dhaxmaray
ciidamada maalmahanba ku dagaalamayay halkaa, lamana oga khasaaraha ka dhashay
dagaalkii xalay.
Waxaa jira baaqyo is daba joog ah oo ka soo baxaya dadka degmada gaar ahaan
Aaga uu dagaalkan ku soo noq noqday oo ka dalbanaya maamulka degmada iyo heer
gobol in wax laga qabto dagaalka u dhaxeeya ciidamada ka wada tirsan dowladda.
Maalmo ka hor ayeey aheyd markii sidan oo kale dagaal khasaare dhimasho
sababay uu ku dhaxmaray ciidamo ka wada tirsan dowladda federaalka xaafadda
Tartuubka ee degmada Hodan.
C/raxmaan Diini, Hiiraan Online
[email protected]
