Talaado, December,
12, 2017 (HOL) - Taliyaha ciidamada
xoogga dalka Soomaalyeed S/Gaas
Cabdiweli Jaamac Xuseen Gorod iyo wefdi uu hoggaaminayo oo ka kooban mas’uuliyiin
ka tirsan Wasaaradda Difaaca Soomaaliya iyo saraakiil sare ayaa shalay gaaray
Magaalada Garoowe.
Taliyaha iyo wafdigiisa waxaa Garoonka dayuuradaha Garoowe ku soo
dhoweeyey taliyaha Ciidamada Daraawiishta Puntland Difaaca Puntland Gen. Siciid
Maxammed Xirsi (Siciid Dheere), hooggaanka ciidamada Daraawiishta iyo saraakiil
ka socotay Taliska ciidamada Xoogga dalka ee deegaannada puntland.
Gen. Siciid Dheere oo sheegay
in Puntland tahay halka ugu ballaaran Soomaaliya oo nabadda iyo xasiloonida ka
jirto, isagoo tilmaamay inuu maqsuud ka yahay imaanshaha taliye Gorod, islamarkaaana ay si gaar ah ugu qiimeyn doonaan taariikhda in markii la
magacaabay durbadiiba Puntland soo booqday.
Taliyaha ciidamada Xoogga
dalka Soomaaliya S/Gaas Cabdiweli jaamac Xuseen Gorod ayaa dhankiisa ka
mahadceliyey soo dhoweynta loo sameeyey, wuxuuna sheegay in isaga iyo
wefdigiisu Puntlnad u yimaadeen sidii ay ula kulmi lahaayeen ciidan gaaraya
2400 askari oo dhowaan Puntland ku wareejisay dowladda Soomaaliya, mid
noqday ciidamada Xoogga dalka.
Taliye Gorod ayaa sidoo kale
sheegay in uu la kulmi doono madaxda Puntland iyo bulshada qaybaheeda kala
duwan, islamarkaana uga sii gudbayo dhinaca gobolka Mudug.
C/raxmaan Diini, Hiiraan Online
[email protected]
