Guddoomiye Jawaari iyo Wasiirka Waxbarashada oo ka qeybgalay qalin jabinta 558 Ardey Jaamacada SIU
Isniin, December, 11, 2017 (HOL) - Munaasabad ay ku qalin jabinayeen 558
Arday oo ka baxay Kuliyadaha kala duwan ee Jaamacadda SIU ayaa shalay ka
dhacday magaalada Muqdisho.
Munaasabadan oo hab maamuuskeedu aad u sareysay ayaa waxaa ka soo
qeyb galay Guddoomiyaha Golaha shacabka Prof. Maxamed Sheekh Cusmaan (Jawaari),
Wasiirka Waxbarashada Xukuumadda Soomaaliya C/raxmaan Dahir Cusmaan,
Guddoomiyaha Jaamacadda SIU Shaafici Diiriye Cabdi, maamulka, macalimiinta
Jaamacadda, madax ka socotay Jaamacadaha Makerere iyo Kenyatta ee Kampala iyo
Nairobi, xubno ka tirsan Goloha shacabka, Guddoonka Gobolka Banaadir.
Ardayda ayaa ka qalin jebiyay illaa afar kuliyadood oo kala ah Kuliyaddaha
Culuumta Caafimaadka, Ganacsiga, Dhaqaalaha, Arrimaha Bulshada iyo
Bani’aadanimada.
Guddoomiyaha Golaha shacabka Maxamed Sheekh Cusmaan Jawaari ayaa ku
booriyay Ardayda ka qalin jebisay Jaamacadda inay sii wadaan waxbarashadooda
illaa ay heerarka ugu sareeya ka gaarayaan.
“Hadda waxaa idiin bilaabatay Jaamacadda aad ka soo baxday mid ka
weyn, waxaa idiin bilaabatay Jaamacadda nolosha aduunka, maadaama aad
waxbarateen waxaa la idinka rabaa in aad dalkiina wax u qabtaan, waan in aad
idinku shaqooyin abuurataan (Self-employment”ayuu yiri Guddoomiye Jawaari.
Dhanka kale, Guddoomiyaha Jaamacadda SIU Shaafici Diiriye Cabdi
ayaa Mahadcelin ballaaran u jeediyay ardayda ka qalin jabisay Jaamacadda iyo
waalidiintooba.
Gudoomiyaha ayaa ardayda ku dhiiri galiyay in ay bulshadda ugu
faa’iideeyaan cilmiga iyo khibradaha ay ka barteen intii ay jaamacadda
dhiganayeen.
“Maanta waad qalin jabiseen, laakiin waxaa idin horyaala
mas’uuliyada adag oo ay ka mid yihiin in aad ku shaqaystaan xirfadaha aad
barateen, bulshaddana wax ku soo kordhisaan”ayuu yiri Guddoomiyaha Jaamacadda.
Aqoonyahanada ka socday Jaamacaddaha dibadda ee ka soo qeyb galay
Munaasabadda qalin jebinta waxaa ka mid ahaa Hajjat Fatumah Nakatudde, Dr Apiyo
Paska, Prof. William Ogara iyo Pro David Minji.
Maamulka Jaamacadda iyo Guddoomiyaha Golaha shacabka iyo
mas’uuliyiintii ka qeyb galay munaasabadda ayaa shahaado guddoonsiiyay
ardayda qalin jebisay.
Mustafa
Hussein
Hiiraan Online
[email protected]