Jimco, December, 01, 2017 (HOL) - Koox
ismiidaamiyayaal ah oo ka kooban afar qof ayaa weerar ku qaaday jaamacad ku
taalla waqooyi galbeed ee dalka Pakistan, halkaasi oo ay ku dileen 9 qof, kuna
dhaawaceen in ka badan 35 kale.
Booliska Pakistan iyo ciidamada ayaa hareeyey Jaamacaddan beeraha ee ku
taalla magaalada Peshawar, halkaasi oo ay ka billaabeen howlgal bad-baadin ah.
Dagaal ay la galeen kooxda argagixisada ayaa qaatay dhowr saacadood,
waxeyna ku dileen dhammaan mintidiinta, sida lagu sheegay bayaan kasoo baxay
militariga, waxey sidoo kale sheegeen in laba Askari ay halkaasi ku
dhaawacmeen.
Inta badan dhibanayaasha weerarkan ayaa ahaa arday, sida ay sheegeen
dhaqaatiirta isbitalka magaalada.
Kooxda Daalibaan ee Pakistan ayaa sheegtay mas’uuliyadda weerarka. Waxay
sheegeen in jaamacaddan ay xiriir la leedahay sirdoonka Pakistan, ayna halkaasi
ku dilee xubno ka mid ah.
VOA
