Jimco, December, 01, 2017 (HOL) - Xiriirka Soomaliyeed
ee Shataranjiga ayaa daah furay tartanka shataranjiga ee Iskuulada magaalada
Muqdusho ee gobolkan Banaadir.
Furitaanka tartankan Shataranjiga ayaa waxaa ka soo
qeyb galay gudoomiyaha xiriirka Soomaliyeed ee shataranjiga Axmed cabdi xasan
wataac iyo masuuliyiin ka kala socday iskuulada tartanka ka qeyb galaya.
Tartankan oo ah midkii ugu horeeyay ee noociisa lagu
qabto gobolka Banaadir ayaa waxaa loo kala qaybiyay Afar heer oo
kala duwan oo kala ah ardayda da’doodu ay ka yartahay 12-ka sano 14-ka sano
16-ka sano iyo 18-ka sano.
Waxaa furitaanka tartankan Shataranjiga ee ka
hadlay gudoomiyaha guddiga Wabarashada iyo Garsoorka ee xiriirka soomaliyeed ee
Shataranjiga Cabdalla Cabdalla Cali kaas oo tartankan ku tilmaamay mid Taariiqi
ah oo loo baahnaa, waxaana uu intaa ku daray in tartanka uu bilow u yahay
tartamo ballaaran oo loo qaban doono iskuulada dalka .
Gudoomiyaha xiriirka soomaliyeed ee shataranjiga Axmed
Cabdi Xassan wataac oo isna ka hadlay furitaanka tartanka ayaa sheegay in
xiriirkiisa guul u tahay qabashada tartanka shataranjiga ee iskuulada gobolkan
banaadir oo ay ka qeyb galayaan arday aad u da’yar.
“Ciyaartan waxa ay ka qeyb qaadataa kaabidda
maskaxda ubadka , hadafkeenuna waa sidii aan u soo saari
laheyn ubad soomaliyeed oo maskax horumarsan leh
kaasoo dalkiisa iyo Isboortigiisa horumar gaarsiin kara” ayuu
yiri Guddoomiye Wataac.
Guddoomiyaha ayaa intaa kaddb ballan qaaday in
ciyaaryahanki natiijo wanaagsan ka keena Tartanka uu fursad u helayo in uu
Soomaaliya ku matalo ciyaaraha da’yarta Shatranjiga Qaaradda iyo
adduunkaba.
Tartanka oo ay ka qeyb galayaan 30 Arday oo ka socta 10
iskuul ayaa socon doona mudoo laba maalmood ah waxaana
gabagabdiisa abaal marino qiimo badan la gudoonsiin doonaa ardayda soo tiigsata
kaalmaha 1-aad 2-aad iyo 3-aad.
C/raxmaan Diini, Hiiraan Online
[email protected]