Kulamo looga arrinsanayo sida laga yeelayo xubnaha gollaha wasiiradda cusub ee Hirshabeelle oo Jowhar ka socda
Jimco, December, 01,
2017 (HOL) – Magaalada Jowhar ee xarunta u ah maamul gobolleedka Hirshabeelle
ayaa waxaa ka soconaya kulamo iyo shirar looga arrinsanayo sidda laga yeelayo golaha wasiirada ka kooban 57da xubnood ee uu
dhawaan ku dhawaaqay madaxweyne Waare.
Xildhibaannada baarlamaanka maamulka Hirshabeelle ayaa
markiiba ka booday magacaabistan uu sameeyay madaxweyne Waare oo qaarkood waxaa
ay sheegeen in madaxweynuhu ka baxay balammo uu horay ugu qaaday.
Tusaale ahaa xildhibaannada ayaa sheegay in madaxweynaha ay
ku balameen in la koobo tirada golaha wasiirada iyo beelaha si siman loogu
qeybo oo dhamaan lagu eedeynayo in madaxweyne Waare uu baalmaray.
Qodobada kale ee xildhibaannadu ku dooddayaan ayaa waxaa ka
mid ah in madaxweynuhu xilal u magacaabay sida uu hadalka u dhigayaan
shaqsiyaad uusan dastuurku u ogolaaneynin in ay qabtaan da’ahaan marka la eego
xilalka loo dhiibay, madaama dastuurku dhigayo qofka wasiirka noqonaya in da’diisa
uusan ka yaraan 30 sano.
Laakiin xubno ku dhaw dhaw madaxtooyada Hirshabeelle ayaa
rajo badan ka qaba in la meelmariyo golaha wasiirada cusub oo markii horeba ku
yimid wadatashiyo dheer oo lala yeeshay xildhibaannada, odayaasha dhaqanka iyo
qeybaha bulshada Hirshabeelle.
C/raxmaan Diini, Hiiraan Online
[email protected]