Talaado, Augusto, 29, 2017 (HOL) – Sida lagu daabcay wakaalada wararka ee Ethiopia
Observer, dowladda Soomaaliya ayaa la sheegay in ay u
gacan galisay Itoobiya sarkaal sare oo ka tirsanaa Jabhada ONLF.
Abdikarim Sheikh Muuse ‘’Qalbi Dhagax’’ ayaa lagu qabtay
magaalada Cadaado oo qiyaastii 500km u jirta magaalada caasimada ah ee Muqdisho
Jimihii aynu soo dhaafnay.
Qaar ka mid ah bogaga Internetka ayaa lagu sheegay in Abdikarim
Muuse yahay sarkaal muhiim ah oo ka tirsan ONLF gaar ahaan garabka
militariga oo ay soo tababartay dowladda Eritrean.
Ethiopian Observer ayaa sheegtay in diyaarad militari
looga soo qaaday sarkaalkan Soomaaliya islamarkaana ka dajisay garoon ku yaala magaalada Bishoftu ee dalka Itoobiya.
Jabhda ONLF ayaa dagaal ku jirtay tan iyo sanadkii
1985tii iyaga oo u arka dowladda Itoobiya in ay gumeysi ku heyso dadka ku
dhaqan dhulka Ismaamulka Soomaalida Itoobiya.
Dowladda Itoobiya ayaa dowladda Soomaaliya ku soo
wareejisay 114 maxaabiis Soomaaliyeed oo muddo dheer ku xirnaa dalka Itoobiya
kuwaa oo bishii July ee sanadkan ka soo degay
garoonka diyaaradaha magaalada Muqdisho.
C/raxmaan Diini, Hiiraan Online
[email protected]
