Jimco, Augusto, 25, 2017 (HOL) –Dowladda Soomaaliya ayaa qiratay in ay ka danbeysay weerarkii lagu qaaday deegaan hoostaga degmada Bariire ee la sheegay in lagu laayahay dad shacab ah oo qaarkood maanta la keenay meydadkooda magaalada Muqdisho.
Wasiirka wasaarada gaashaandhiga Soomaaliya Cabdirashiid
Maxamed Cabdullaahi ayaa sheegay in weerarkaasi fuliyeen ciidamada xoogga dalka
Soomaaliyeed, isaga oo meesha ka saaray in weerarkaasi qeyb ka ahaayeen ciidamo ka tirsan
shirkadda Bancroft oo ay sheegeen dadka deegaanka ay in howlgalka ka qeybqaateen
‘’Dadkan waxaa ay ahaayeen dad hubeysan oo ciidamada rasaas
ku furay sidaa ayeey ku dhinteen, wixii intaa dhaafsiisan waan baareynaa’’ ayuu yiri
wasiirka.
Wasiir Cabdirashiid ayaa sheegay in aysan ka warqabin in
dadka dhintay ay ka mid ahaayeen Carruur, isaga oo sheegay in warka ay hayaan
yahay oo kaliya in dadka goobta lagu laayay ahaayeen dad hubeysnaa oo rasaas
adeegsaday.
Meydadka
maanta la soo gaarsiiyay magaalada Muqdisho ayaa waxaa ka mid ahaa Carruur iyo
dad waayeel ah oo la sheegay in lagu dilay howlgalkii maanta ka dhacay deegaan
hoostaga degmada Bariire.
C/raxmaan Diini,
Hiiraan Online
[email protected]
