Arbaco, Augusto, 23, 2017 (HOL) – Kulan maanta ku dhaxmaray magaalada
Muqdisho madaxda ugu sareysay dowladda federaalka gaar ahaan ra’iisal wasaare Xassan Cali Kheyre iyo wakiilada beesha caalamka ayaa looga wada
hadlay hormarada kala duwan oo ay sameysay dowladda Soomaaliya mudadii ay
jirtay.
Dowladda ayaa dhinaceeda ku eedeysay beesha caalamka in aysan ka soo bixin
taageeradii dhaqaale ee horay loogu baqanqaaday dowladda, waxaana ka mid ahaa
balanqaadyadii ku xusnaa war-murtiyeedkii ka soo baxay shirkii London lagu qabtay.
Shirka ayaa waxaa si gaar ah loogu lafa-guray waxyaabihii leysku afgartay
shirkii London iyo sababta dib –u-dhaca ku keenay qodobada qaar ee ku xusnaa
war-murtiyeedkii shirka oo ay madaxdu sheegeen in aysan u dhicin sidii loo qorsheeyay.
Wasiiru-dowlaha xafiiska ra’iisal wasaaraha Cabdullaahi Xaamud ayaa
warbaahinta uga warbixiyay kulanka ay ujeedadii laga lahaa isaga oo yiri’’
Waxey aheyd oo kaliya in leys weydiiyo wixii soo qabsoomay saddexdii bilood ee
la soo dhaafay, meesha loo socdo iyo waxa aan uga baahannahay wadamada
caalamka, wax yaabaha laga wada hadlay waxaa ka mid ahaa dhaqaale abuur loo
sameynayo dalka dib-u-eegista dastuurka, shaqa abuurka iyo sidii loo mideyn
lahaa dhaqaalaha Soomaaliya’’ ayuu yiri wasiir Xaamud.
Waxaa uu sheegay in leysku afgartay in si wada jir ah loo shaqeeyo, isaga oo intaa ku daray in wakiilada beesha caalamka qodobadii laga wadahadlay dib ugula noqon doonaan dowladdaha ay matalaan.
Sidoo kale Micheal Keating ayaa dhinaciisa ka hadlay qodobadii diirada lagu
saaray kulankii maanta ka dhaxmaray wakiilada beesha caalamka iyo madaxda
dowladda federaalka Soomaaliya, isaga oo yiri ‘’ Saddex wayaabood ayaa ka
hadalnay, waxaa ugu horeeya Siyaasada, halka ay mareyso dib-u-eegista dastuurka,
doorashooyinka sanadka 2020-21 –ka iyo sidoo kale waxaan xoogga saarnay abuurka ilo
dhaqaale ’’ ayuu yiri Micheal Keating.
Shirkii bartamihii May ka dhacay magaalada London ayaa waxaa ka soo baxay
qodobo badan oo dhamaantood quseeya Soomaaliya, kuwaa oo si gaar ah loogu
lafaguray shirkii maanta.
C/raxmaan Diini, Hiiraan Online
[email protected]
