Rasaas dhimasho sababtay oo lagu furay gaari ay la socdeen dad shacab ah gobolka Shabeellaha hoose
Arbaco, Augusto, 23, 2017 (HOL) – Wararka naga soo gaaraya degmada Afgooye
ee gobolka Shabeellaha hoose ayaa sheegaya in dabley rasaas ku furtay gaari ay
la socdeen dad shacab ah habeenimadii xalay.
Inta la xaqiijinayo ilaa saddex ruux oo rayid ah ayaa ku geeriyootay rasaasta
lagu furay gaariga, halka sidoo kale ay ku dhaawacmeen dad kale shacab ah,
waxaana meydadka saddexda ruux la keenay oo la dhigay isbitaalka degmada
Afgooye.
Dableyda rasaasta ku furtay gaariga ayaa la sheegay in ay jidgooyo u taalay
iyaga oo ku amray darawalka in uu gaariga joojiyo, hasse ahaatee waxaa la
sheegay in uu ka dhaga-adeygay amarka la siiyo taasoo keentay in ay rasaas ku furaan.
Gobolka Shabeellaha hoose ayaa lagu tilmaamay halka ugu badan oo yaalaan Isbirooyinka lacagaha looga qaado gadiidka, kuwaa oo mar marka qaar wax yeello
u geysta wadayaasha gadiidka iyo dadka la socda intaba.
Madaxweynaha dowladda Soomaaliya Maxamed Cabdullahi Farmaajo ayaa horay amar ugu bixiyay in la qaado
dhamaanba jidgooyooyinka yaala gobolka Shabeellaha hoose, kaddib markii ay
cabasho arintaa ku saabsan soo gudbiyeen dadka ku dhaqan gobolka
C/raxmaan Diini, Hiiraan Online
[email protected]