Isniin, August, 21, 2017 (HOL)-
Wasaaradda waxbarashadda iyo tacliinta sare Somaliland ayaa shaacisay toddobo
dugsi sare oo ku yaala magaaladda Hargeysa ay kala noqotay rusqaddihii ay ku
shaqaynayeen, ka dib markii ay ka hor yimaadeen awaamiir ay hore wasaaraddu ugu
soo jeedisay dugsiyadda sare ee Somaliland.
Agaasimaha dugsiyadda gaarka loo
leeyahay Muuse Maxamed Shidde ayaa ku dhawaaqay toddoba dugsi oo kuwo sare ee
gaarka loo leeyahay oo rusqaddii kala noqdeen, waxaana lagu eedeeyey in ay iska
qorteen arday aan wali imtixaankii fasaladdii 8aad ee ay galeen loo dhajin,
waxaana hore amar loogu siiyey in aanay iska qorin arday aan haysan shahaadadda
dugsiyadda dhexe,isla markaana inta arday waliba imtixaankiisa loo soo
dhajinayo aanay qaadadin wax arday ah.
“ wasiirka waxbarashaddu wuxuu dugsiyadda sare
ku xidhay shuruud ah in fasaladda 8aad inta la saxayo imtixaankoodii oo ka
dhacay iyo ka baasay la kala ogaanayo in aan la qoran wax arday ah”ayuu yidhi
agaasimaha dugsiyada gaarka loo leeyahay Shide.
Haseyeeshee toddobadan dugsi sare
waxay jabiyeen amarkaasi, waxaana la sheegay inay iska qorteen arday aan wali
imtixaankoodii la soo dhajin, taasina waxay keentay in gabi ahaanba rusqaddii
la kala noqdo.
Toddobadan dugsi sare ee
rusqaddii la kala noqday waxay kala yihiin:
1. dugsiga sare ee Tomorrow, 2.
Dugsiga sare ee Shamdudiin la odhan jiray imikana la baxay 17 May, 3, Dugsiga
sare ee Ilays one, 4. Dugsiga sare ee Amaana, 5. Dugsiga sare ee Aclas, 6,
dugsiga sare ee Caalami iyo 7. Dugsiga sare ee Future.
Wasaaradda waxbarashada ayaa
mudooyinkii u dambeeyey qaadaysay talaabooyin lagu horumarinayo,isla markaana
wax lagaga qabanayo wixii carqalad ku ah waxbarashadda caruurta,iyadoo hore loo
soo bandhigay macalimiinta qishka u fududeeya ardayda galaya imtixaanka
shahaadiga ee Dugsiga sare, kuwaas oo
laga mamnuucay inay dib wax u baraan ardayda.
Barkhad-ladiif M. Cumar,
Hiiraan Online
[email protected]
Hargeysa, Somaliland.
