Isniin, Augusto, 21,
2017 (HOL) – Xildhibaannada maamulka gobolleedka Galmudug ayaa intooda badan
siweyn uga hor yimid go’aan uu qaatay madaxweyne Axmed Ducaale Geelle Xaaf oo u
sheegay baarlamaanka in uusan soo magacaabis doonin gole wasiiro cusub, laakiin
uu dib u soo celin doono kuwii hore ee maamulkii Cabdikariin Xusseen Guulleed.
Xildhibaannada ayaa sheegay in arintaasi tahay mid aan la
aqbali karin, islamarkaana madaxweynaha looga fadhiyo in uu soo magacaabo gole
wasiiro cusub.
Duraan Cali Jaamac oo ka mid ah xildhibaannada baarlamaanka
Galmudug oo warbaahinta la hadlay ayaa sheegay in ay madaxweynaha ka diiden go’aanka
uu ka qaatay soo magacaabista golaha wasiirada, waxaana uu intaa ku daray in ay
ka doonayaan gole wasiiro cusub.
‘’Waxaa loo baahan yahay in Galmudug isbadal dhinaca
maamulka uu ka dhaco, in badan oo xildhibaannada ah waxaa ay qabaan in go’aanka
madaxweynaha uusan sax aheyn, loona baahan yahay gole wasiiro cusub’’ ayuu yiri
xildhibaanka.
Bishii May ee sanadkan ayaa loo doortay Axmed Ducaale Geelle
Xaaf madaxweynaha Galmudug tan iyo wixii waqtigaa ka danbeeyayna ma uusan soo
magacaabin golle wasiiro cusub, waxaana sii shaqeynaya gollihii wasiirada maamulkii Cabdikariin Xusseen
Guulleed.
C/raxmaan Diini, Hiiraan Online
[email protected]