Wasiir Xoosh oo kulan la qaatay guddiga la socodka dib –u-eegista dastuurka ee gollaha baarlamaanka
Axad, Augusto, 20, 2017 (HOL) – Wasiirka
Dastuurka dowladda federaalka Soomaaliya
Cabdiraxmaan Xoosh Jabriil oo ay weliyaan agaasimaha guud iyo la-taliyayaal ka
tirsan wasaaradda ayaa maanta la kulmay guddiga baarlamaanka ee la-socodka dib-u-eegista
dastuurka.
Kulanka oo ka dhacay xarunta Aqalka Sare ayaa waxaa ugu horeyn wasiirka iyo xubnahii
la socday soo dhaweeyey gudoomiyaha guddiga Senator Cabdi Cawaale Qaybdiid.
Intaa kaddib wasiirka dastuurka Cabdiraxmaan Xoosh Jabriil ayaa guddiga faah
faahin dheeraad ah ka siiyay howlaha wasaarrada ee la xiriira dib-u-eegista
dastuurka.
“Anaga markii aan la wareegnay xilka wasaaradda
waxaa aan go’aansanay in aan bilaawno u diyaar- garoowga geedi-socodka dib-u-eegista
dastuurka, waxaa aan kulamo wadatashi ah ku qabanay qaar kamid ah dawlad
goboleedyada oo aan ku dhageeysaneynay ra’yiga shacabka ee ku aadan ololaha
dib-u-eegista dastuurka ee dalka ka bilaabmi doona sanadkan” ayuu yiri
Wasiirka.
Wasiirka ayaa sidoo ka hadlayay muhiimadda ay leedahay wada-shaqayn
dhexmarta wasaaradda iyo guddiga isaga oo yiri “In aan wadashaqayn idin la
yeelanno waa mid lagama maarmaan ah oo aan su’aal la gelin karin oo ay tahay in
aan bilawno, diyaar ayaan idiin nahay waqti walba oo aad noo baahataan si aad
su’aalo nooga weydiisaan hawlaha socda, farxad wayn bay ii tahay in aan wada-shaqayno
guddigan oo xubnaha katirsan badankood aanu nahay asxaab horey u soo wada-shaqeysay
oo ka wada tirsanaa Baarlamankii 9aad” ayuu yiri wasiirka.
Dhinaca kale gudoomiye Cabdi Qaybdiid ayaa wasiirka uga mahad-celiyay
hawlaha ay wasaaradda qabatay, waxaana uu ballan-qaaday in ay si dhaw u
wadashaqayn doonaan si dadka Soomaaliyeed ay u heelaan dastuur dhameeystiran.
C/raxmaan Diini, Hiiraan Online
[email protected]