Axad, Augusto, 20, 2017 (HOL) – Weerarrada shaqaalah
gargaarka QM ee ka howlgala gudaha dalka Soomaaliya ayaa kordhay sanadkan,
iyadoo natiijada weeraradan ay noqotay in ay dhintaan qaar ka mid ah shaqaalaha
gargaarka ka howlgala.
Peter de Clercq oo
ah Xiriiriyaha arimaha bani’aadannimada ee Soomaaliya ayaa sheegay in sanadkan
oo kaliya la soo wariyay 100 weerar oo lagu beegsaday shaqaalaha gargaarka,
waxaana afar ka mid ah weeraradaa ay sababeen dhimasho.
‘’Soomaaliya, shaqaalaha
caafimaadka iyo kuwa arimaha bani’aadannimada ka shaqeeya ayaa la
bartilmaameedsaday, sidoo kale waxaa jiray gargaar la xaday’’ ayuu yiri Peter
de Clercp.
Xiriiriyaha ayaa ku
amaanay shaqaalaha gargaarka QM sida ay ugu dhabar adeygayaan u gaargaarida
dadka dhibaateysan iyo ka hortaga macaluusha halista ku ah Soomaaliya.
‘’Waan uga mahad celineyaa
shaqaalaha gargaarka sida ay nolashooda maalin walba halista ugu galinayaan,
iyaga oo u adeegaya dadka dhibaateysan, waxaanan ku dhiirigalineynaa in aysan
niyad jibin’’ ayuu yiri Peter.
Hadalkan ayaa imanaya xili
maalintii shalay loo dabaal-degay maalinta gargaarka Bani’aadannimada, waxaana
ay saraakiishu ku baaqeen in la joojiyo beegsiga shaqaalaha gargaarka iyo dadka
aan waxba galabsan ee Soomaaliyeed.
C/raxmaan Diini, Hiiraan Online
[email protected]
