Dagaal u dhaxeeya ciidamada Ahlu Sunna iyo dadka deegaanka oo ka socda deegaanka Xeraale
Axad, Augusto, 20, 2017 (HOL) – Wararka naga soo gaaraya
degmada Xeraale ee gobolka Galguduud ayaa sheegaya in halkaa uu ka soconayo
dagaal culus oo u dhaxeeya ciidamada Ahlu Sunna Waljameeca iyo maleeshiyaad
abaabulan oo ka tirsan dadka deegaanka.
Dad ku sugan deegaanka Xeraale ayaa warbaahinta u sheegay in
dagaalka uu waqtigan soconayo, islamarkaana dhinacyada iska soo horjeeda is
weydaarsanayaan hub noocayadiisa kala duwan oo ay ku jiraan gadiidka dagaalka.
Ilaa iyo hadda lama oga khasaaraha rasmiga ah ee ka dhashay
dagaalka danbe ee la sheegay in uu dib uga qarxay deegaanka Xeraale.
Maalintii shalay ayaa madaafiic lagu tuuray Xeraale waxaa ku
dhintay labo ruux oo haween ah oo ka mid ahaa dadka degmada.
Dagaalka u dhaxeeya Ahlu Sunna iyo maleeshiyaadka deegaanka
ayaa labadii cisho ee la soo dhaafay halkaa ka soconayay, mana jiro wax war ah
oo ilaa iyo hadda ay soo saareen mamullada Galmudug iyo Ahlu Sunna ee gobolka
ka wada arimiya.
C/raxmaan Diini, Hiiraan Online
[email protected]
