Sabti, Augusto, 19,
2017 (HOL) – Xujayda Soomaalida ah ee ka timid
wadanka gudihiisa ayaa eedeen u soo jeediyey dadka kaxeeya xujaydda oo ay
sheegeen in ay lacag badan ka qaadeen, islamarkaana meelaha ugu hooseeya la
dajiyo.
Xujaydan
Soomaalida ayaa sheegay lacagta laga qaada iyo adeega iyo goobaha la
geeyaa in aysan isku dhigmin, waxaana ay tilmaameen hoteeladda ugu jaban aan wanaagsaneyn la dajiiyo taas oo ay barbar dhigeen Xujayda kale oo la
dajiyo hotelada ugu wanaagsan oo waliba masaajidka Nabiga lagu
dhaweeyo.
Wariye
ka tirsan telefishanka Universal oo ka mid ahaa xujayda ka timid Yurub ayaa isbarbar
dhig ku sameeyey xujayda Soomaalida ka timid wadanka gudihisa iyo kuwo ka yimid
Yurub oo qiimo jaban lagu soo qaado meelo aad u heer sareeyana la geeyo, halka
Xujayda wadanka gudihiisa ka timaada lacag badan iyo adeeg aan u qalmin la
iskugu daro.
“Haddii
aanu nahay Xujayda ka soo xajday Hargeysa waad arkaysaa hoteelka aan ku jiro
kulaylka ka jira iyo dhididka naga baxaya, waayo qof walba waxaa laga soo
qaatay lacag ku dhaw afar kun, halka Jabuuti lagaga soo Xajiyo kun iyo lix boqol
oo doolar, wixii dadka laga qaaday dhib ma leh laakiin waa in ay dadku helaan
adeeg wanaagsan oo u qalma, tusaale ahaan xaramku wuxuu noo jiraa 5m, halka Xujayda Soomaalida ah ee qurbaha ka yimaada oo lacag intan
ka yar laga qaado hoteelo raaxo leh iyo masaajidka agtiisa la dajiyo,”ayuu
yiri mid ka mid ah Xujayda Soomaalida.
Wiil
dhalinyar ah oo waday Ayeydii ayaa isna ka sheekeeyey dhibaatadda ka soo
gaartay Xajka iyo goobta la dajiyey oo aan lahayn adeeg ku haboon, waxaanu
yiri “Masaajidkii nabigu wuxuu noo jira 500m oo ku dhow
hal killo mitir, Anigu waan socon kara iyo dadka dhalinayrada ah laakiin
ayeyday oo kale waxay ku qaadanaysa wakhti dheer inta ay sii soconayso iyo inta ay
soo soconayso, markii aanu ka iminaynay Hargeysa waxay nagu yiraahdeen Anaga
adeegiina oo dhan diyaarinayna, laakiin maanu arag adeegii ay noo balqaadeen qofku isaga uun baa la silcaya qofkii uu waday oo ilaa masaajida
Nabiga oo naga fog kolna la lugaynaya kolna ka soo kaxaynaya waana silic iyo
dhibaato badan oo na haysata”
Dhinaca
qurbo joogta soomaaldia ee xajka timid ayaa iyagu amaanay sida loo qaabilay iyo
adeega wacan ee loo fidiyey, waxeyna sheegeen in ay u mahad celinayaa dadkii
soo kaxeeyey, waxaanu yidhi“Anagu waxaanu deganahay masaajidkii Nabiga agtiisa,
salaad walba oo ka mida ah waxaanu ku tukanaa masaajidka, hoteelada aan ku
jirnaa waa kuwo raaco leh.”
“Anaga
qoladii naga soo qaaday Birmaham (Ingiriiska) waxay ahaayeen qolo aad u
wanaagsan oo illaa magaalooyinkii aanu ku soo nasanay illaa Maka iyo
Madiina meelaha ugu wanaagsan nagu dajinayey, imika hoteel aad u wanaagsan
ayeey na dajiyeen, masaajidkana uu u jira saddex daqiiqo
oo salaad walba aan ku tukano,”ayuu yiri nin ka mid ah xujayda ka yimid Qurbaha.
Sheikh
Maxamed Haybe oo ka mid ah xujayda soomaaldia ee sanadkan soo xajay ayaa
walaac xoogan ka muujiyey soomaalida xujayda ah ee ka timid wadanka gudihiisa
iyo nolosha adag iyo adeeg la’aanta ay wajahayaan marka Xajka
gudanayaan, isaga oo yiri “ War dadka xujeyda wadda Aakhrina ha ku gubanina,
aduunyada ha ku ceeboobina, ilaahayna xaaraan ha ka shaqaysanina, oo u tura oo
u naxa oo hadii aydaan caawin karin faraha ka qaada, waa wax laga naxo oo calool xumo ah oo laga ilmeeyo oo aragax leh ayaad dadkaasi ku arkaysaa xujayda ah ee wadanka gudihiisa ka timid, ma jiro dad kale oo wadan
kale ka yimid oo noloshaasi oo kale ku nool, xitaa dadka aduunka ugu fiqiirsan
kuma jiraaan halka geeyo dadka Soomaalida ah ee xujayda ah”.
Dadka
xujayda soomaalida ah ayaa laga qaadaa lacag faro badan oo ku dhaw afar kun oo
dollar, halka wadamadda jaarka sida Itoobiya iyo Jabuuti qofka xajka tagaya ay
kaga baxdo uun kun iyo lix boqol oo doolar, waxaana soomaalida u sii dheer
goobaha ugu qiimaha hooseeyo oo la dajiyo iyo dhibaatooyin badan oo ay kala
kulmaan wakhtiyada ay cibaadaysanayaan.
Barkhad-ladiif
M. Cumar, Hiiraan Online
[email protected]
Hargeysa,
Somaliland.
