Sabti, Augusto, 19, 2017 (HOL) –Magaalada Jowhar waxaa
booqday maalin ka hor wafdi heer wasiiro
ah oo ka socday xukuumada Soomaaliya, kuwaa oo wada hadalo la yeeshay mas’uuliyiinta
sar sare ee maamulka Hirshabeelle kaddib xiisad ka dhalatay xil ka qaadis la
sheegay in lagu sameeyay madaxweyne Cali Cabdullaahi Cosoble.
Wafdiga tagay magaalada Jowhar oo uu horkacayay wasiirka
arimaha gudaha Cabdi Faarax Juxa ayaa sidoo kale waxaa ka mid ahaa wasiirka
amniga Maxamed Abuukar Isloow Ducaale iyo wasiirka waxbarashada C/raxmaan
Daahir Cismaan.
Wafdiga oo ujeedada socdaalkooda lagu sheegay qiimeyn in uu u kuur-galida aragtida
mas’uuliyiinta Hirshabeelle iyo bulshada ee ku aadan is–mari-waaga siyaasadeed
ayaa lagu wadaa in ay xogtooda la wadaagaan mas’uuliyiinta ugu sareysa dowladda
federaalka, gaar ahaan ra’iisal wasaare Kheyre oo la sheegay in uu markii
horeba wafdigan u diray Jowhar.
17kii October, sanadkii 2016- ka ayaa loo doortay Cali Cabdullaahi
Cosoble madaxweynaha maamulka Hirshabeelle, taasoo mincaheedu noqonayo in maamulka curdanka ah ee jira wax ka yar sanad
durbaba uu la kowsaday xiisad siyaasadeed iyo is qabqabsi mas’uuliyiinta
dhaxdooda ah.
Dowladda federaalka Soomaaliya ayaa lagu wadaa in ugu
danbeyntii ay ka soo saarto go’aan arintan ku saabsan qalalaasaha siyaasadeed
ee Hirshabeelle kaddib booqashadii wafdiga ka socday xukuumada ee
tagay Jowhar.
C/raxmaan Diini, Hiiraan Online
[email protected]
