Ciidamada Dowladda iyo kuwo Cadaan ah oo la wareegay gacan ku haynta deegaanka Bariire ee Gobolka Sh/Hoose
Sabti, Augusto, 19, 2017 (HOL) –Ciidamo isugu jira Cadaan iyo kuwa dowladda
Soomaaliya ayaa la wareegay deegaanka Bariire ee gobolka Shabeellaha Hoose,
sida saraakiil ka tirsan ciidanka dowladda ay sheegeen.
Deegaanka Bariire, ayaa waxaa uu dhacaa duleedka Degmada Afgooye ee Gobolka
Shabeellaha hoose, waxaana weerar qorsheysan ku qaaday ciidamo ka tirsan
Dowladda Federalka Somaliya oo wehlinaya ciidamo kale oo Cadaan ah.
Sarkaal ka tirsan ciidamada Dowladda ayaa sheegay dagaal kooban, kadib
ciidamada inay si buuxda ula wareegeen gacan ku haynta Degmada Bariire, kadib
markii halkaasi ay isaga baxeen ciidankii Shabaab ee ku sugnaa.
Deegaanka Bariire ayaa waxaa bilihii lasoo dhaafay gacanta ku hayay
xarakadda Al Shabaab.
Xaaladda deegaanka ayaa hadda degan waxaana ciidamada dowladda ay waddaan
howlgallo ammaanka ay ku darsayaan.
Maamulka dowladda ee Gobolka Shabeellaha Hoose, ayaa bishii lasoo dhaafay
waxaa ay sheegeen in ay bilaabayaan howlgallo ay ku doonayaan in ay kula
wareegaan deegaannada Al Shabaab ay ka maamulaan Gobolka.
Hiiraan Online,
Hassan Istiila
[email protected]
Mogadishu,Somalia