Sabti, Augusto 12, 2017 (HOL) – Rasaas ayaa laga maqlay qeybo ka mid ah
xaafaddaha ay ku badan yihiin taageerayaasha hogaamiyaha mucaaradka Raila
Odinga, kaddib ku dhawaaqistii xalay Uhuru Kenyatta in uu ku guuleystay
doorashadii madaxweynaha shanta sano ee soo socta.
Gaar ahaan rabashadahan ayaa intooda badan waxaa ay ka
dhaceen xaafaddaha Kibera iyo Mathare oo ah xaafaddo isku raran ah
oo ay ku nool yihiin dadka saboolka ah.
Sidoo kale magaalada dhinaca galbeedka ku taalla Kisumu
rabshado ayaa ka dhacay, waxaana iska horyimid dad carreysan iyo ciidammada
booliiska ee rabashadaha ka hortaga.
Ciidamada
booliiska Kenya ayaa rasaasta dadka ka ilmeysiisa ku furay dad rabshado ka
dhigay, kuwaa oo ku qeylinayay magaca hogaamiyaha mucaaradka Raila Odinga.
Dhinaca kale,
hay’adda Human Rights Watch ayaa booliska Kenya ugu baaqday in ay is-xakameeyaan
xiligan xasaasiga ah oo aanay awood u isticmaallin dadka dibadbaxyada
sameynaya.
Human Rights
Watch waxay sheegtay in dibadbaxyada dhacaya iyo rasaas xoog badan oo meelaha
qaarkood laga soo sheegayo, ay muhiim u tahay ciidanka amniga inay xaaladda
dajiyaan ee aanay uga sii darin rabshadaha.
“Booliska yaanay
isticmaalin suntan dada kaga ilmeysiisa iyo rasaasta nool” sidaasi waxaa
sheegay Otsieno Namamaya oo ka tirsan hay'adda Human rigths Watch.
Natiijada xalay ay ku dhawaaqeen guddiga doorashada dalka
Kenya ayaa horayba loo sii saadaalinayay, hasse ahaatee mucaaradka mar walba
waxaa ay ka biyo –diidanaayeen in natiijadu aheyd mid sax ah, iyaga oo sheegay
in wax is daba marin lagu sameeyay codadkii la dhiibtay.
C/raxmaan Diini, Hiiraan Online
[email protected]