Xarunta xuquuqda aadanaha ee Somaliland oo ka warbixiyey afartii bilood ee sanadkan inta wariye la xiray
Jimco, April, 07, 2017 (HOL) –Xarunta Xuquuqda Insaanka
madaxa banaan ee Human Rights Center (HRC) ayaa soo bandhigay warbixintooddii
afar biloodka sanadka 2017 ee tacadiyada lagula kaco warbaahinta iyo
suxufiyiinta maxaaliga ee ka hawlgala degmooyinka iyo gobolada Somaliland.
Gudoomiyaha xarunta xuquuqal insaanka Somaliland garyaaqan
Guuleed Axmed Jaamac oo ka hadlay warbixintoodda afarta bilood ee sanadka ayaa
sheegay in mudadaasi la xidhay 11 wariye.
“Xarunta Xuquuqal Insaanku soo saartay warbixinteeda
afar bilood lah ee ay ku eegto xaaladda saxaafadda Somaliland. Warbixintu
waxaay koobsanaysaa xadhiga suxifiyiinta ee ay diiwaangelisay intii u dhaxaysay
10ki December 2016 ilaa 31ka March 2017.Afartii bilood ee u danbeeyey waxay
diiwaangelisay Xarunta 11 suxufi oo la xidhay. Todoba ka mid ah waxa lagu
xidhay Hargeysa, hal suxufi Saaxil, hal suxufi Sanaag, hal suxufi Sool, suxufi
kalena waxa lagu xidhay Awdal.”ayaa lagu yidhi warbixintooda.
Waxaanay intaas ku dareen “Suxufiyiintaas mid qudha oo ah
Cabdimaalik Muuse Coldoon ayaa lagu soo oogay dacwad. Maxkamadda Gobolka
Hargeysa waxay dhegaysatay dacwadda Coldoon 4tii iyo 5tii April. Waxaay u
mudeeysay 8 April inay ku dhawaaqdo xukunka.
Sidoo kale waxa Maxkamada Rafcaanka Gobolka Hargeysa ay ku
dhawaaqday 25kii February 2017 xukun dacwad ciqaab ah oo ka dhan ahayd
Cabdirashiid Nuur Wacays iyo Siciid Khadar oo ah madaxda wargeyska la xayiray
ee Hubsad. Maxkamaddu waxay ayiday xukunkii Maxkamadda Gobolka ee cadeeyey
inaanay wax dembi ah gelin suxufiyiintu. Weli se waxa xayiran wargeyska Hubsad
oo ay maxkamaddu sheegtay inuu u baahan yahay inuu dhamaystirto waxyaalo ay
sheegtay maxkamadu inuu ka dhiman yahay.
Xaruntu waxaay ku talisay in la joojiyo xadhiga iyo
dacwadaynta suxufiyinta, islamarkaana in la ogolaado in la diiwaangeliyo
warbaahin cusub iyada oo aan la is hortaagayn in kuwa jira cid kale la
wareegto. Waxaay ku talisay in la joojiyo xeerka ciqaabta ee loo adeegsanayo
warbaahinta. Waxay kula talisay ururada bulshada rayidka ah inay gacan qabtaan
oo taageeraan warbaahinta iyo suxufiyiinta Somaliland oo aan la dayicin.
Xaruntu waxay ku baaqaysaa in xayiraadda laga qaado wargeysyada Haatuf, Hubsad
iyo Codka Shacabka.”
Barkhad-ladiif M. Cumar, Hiiraan Online
[email protected]
Hargeysa, Somaliland.
