Arbaco, April, 05, 2017 (HOL) -Wafdi uu horkacayo madaxweyne ku -xigeenka dowlad gobolleedka Hirshabeelle Cali
Guudlaawe Xuseen ayaa maanta gaaray magaalada
Beledweyn ee Gobolka Hiiraan, iyadoo si diiran loogu soo dhoweeyay.
Madaxweyne ku-xigeenka waxaa safarka ku wehlinaya wasiiro, xildhibaano iyo guddoomiyaha gobolka Shabeellaha dhexe, waxaa soo
dhoweeyay mas’uuliyiin uu horkacayay guddoomiyaha Gobolka Hiiraan iyo qeybaha
kala duwan ee bulshada.
Cali Guudlaawe ayaa ujeedada socdaalkiisa ku sheegay u kuurgalka xaalada gobolka, isla markaana nidaamka
dowladda loo gaarsiin lahaa deegaanada gobolka.
Waxaa uu ka mahad celiyay
soo dhoweynta loo sameeyay, waxaana uu tilmaamay in Maamulka Hirshabeelle uu ka
qeyb qaadanayo arrimaha gurmadka abaaraha ku dhiftay deegaanada uu maamulka ka
arrimiyo.
Wafdiga ayaa inta uu joogo magaalada Beledweyn waxaa uu kulamo la
qaadanayaa qeybaha kala duwan ee bulshada ku dhaqan Beledweyn.
Ugu danbeyntii, socdaalkan ayaa noqonaya kii ugu horeeyay ee
Madaxweyne kuxigeenka Hirshabeelle uu ku tago magaalada Beledweyn ee Gobolka
Hiiraan, tan iyo markii xilka loo doortay.
C/raxmaan Diini, Hiiraan Online
[email protected]
